DILI, 17 Marsu 2026 (TATOLI)–Polísia Sientífika Investigasaun Kriminál (PCIC, sigla portugés) koordena ho Polísia Nasionál Timor-Leste (PNTL) no Banco Central Timor-Leste (BCTL) hodi hahú halibur informasaun no buka indentifika suspeitu ne’ebé mak prodús osan falsu moeda sentavus $200 ne’ebé sirkula iha Timor-Leste.
Diretór PCIC, Vicente Fernandes i Brito, hateten, problema kona-ba intervensaun ba moeda falsu ne’e, daudaun ne’e PCIC koordena ho entidade kompotente hodi halo investigasaun, nune’e prosesu investigasaun la’o hela.
“Maibé to’o ohin loron seidauk iha levantamentu autus krime, ne’ebé ita sei rekolla informasaun, depois ita prepara halo atuasaun, ha’u sei informa,” Diretor PCIC informa ba Jornalista Ajénsia TATOLI iha ninia knaar fatin, Kolmera, Tersa ne’e.
Notísia relevante : BCTL apela ba públiku no loja sira atu kontinua utiliza moeda sentavu 200
Nia dehan, to’o agora PCIC seidauk simu keixa ruma maibé promete sei buka tuir autór sira ne’ebé mak prodús osan falsu.
“Ita koordena sei buka tuir suspeitu sira, maibé kona-ba keixa normalmente ha’u seiduak simu, maibé ita koordena hela investigasaun, nune’e se ita lori ba Ministériu Públiku tenke iha provas ne’ebé sufiente,” nia katak.
Diretór hatutan: “Maibe tanba ein termu prosesuál ema seidauk mai keixa, entaun presiza iha keixa mak halo asaun. PCIC persiza rekolla prova sira, foin mak investiga.”
Jornalista : Natalino Costa
Editora : Julia Chatarina
