BAUKAU, 18 Marsu 2026 (TATOLI)—Autoridade suku sei kontinua reabilita estrada iha Suku Alawa Kraik liuhusi atividade Programa Nasionál Dezenvolvimentu Suku (PNDS).
Xefe Suku Alawa Kraik, Postu Administrativu Baguia, João Baptista Antônio Alves, esplika liuhusi reuniaun Konsellu Suku deside reabilita estrada tanba hakarak asegura movimentasaun transporte entre suku ba aldeia no suku bá suku.
“Ami kontinua reabilita estrada ne’ebé hahú iha tinan kotuk,” Xefe Suku Alawa Kraik informa ba Ajénsia TATOLI iha Vila Nova, Kuarta ne’e.
João Alves relata, tuir planu, estrada ne’ebé sei hadi’a hamutuk kilómetru lima entre Aldeia Neolidae ba Uasufa, Sorokama ligasaun bá Aldeia Larisula husi Suku Haekoni iha-ne’ebé tama ona ba faze levantamentu dadus tékniku ho totál orsamentu hamutuk $38.500.
Nia hateten, mekanizmu serbisu ba reabilita estrada mak ateru, cor beton ba área subida, hadi’a valeta no ponte ki’ik ne’ebé sei benefísia komunidade husi suku rua purvolta besik rihun tolu resin.
“Estrada ne’e kuandu di’ak bele minimiza ona komunidade nia preokupasaun,”João informa.
Entretantu, Suku Alawa hamutuk aldeia lima kompostu husi Afaguia, Alawa, Neolidae, Sorokama no Uasufa ho totál populasaun 2.198 husi uma-kain 440.
Jornalista: Natalino Belo
Editór: Xisto Freitas da Piedade
