VIKEKE, 18 Marsu 2026 (TATOLI)—Administradór Postu Vikeke Vila, Munisípiu Vikeke, Leopoldo da C. Alves, informa postu Vikeke Vila aprova ona programa prioridade hitu ba tinan 2027 iha sorumutu Asembleia Postu Administrativu (ASPA).
“Planu 2027 nian ami realiza ona ASPA no liuhusi sorumutu ASPA ne’e ami deside ona programa prioridade hitu husi Postu Vikeke Vila ne’ebé hetan ona aprovasaun husi membru ASPA sira,” Leopoldo ba TATOLOI iha resintu Munisipál Vikeke, Kuarta ne’e.
Autoridade Vikeke Vila ne’e aprofunda programa prioridade Postu Vikeke Vila ba tinan 2027 ne’e maioria ba setór agrikultura no infraestrutura bázika (estrada) ba fatin turizmu sira.
“Iha ami-nia planu prioridade ne’ebé ami aprova ona iha ASPA ne’e maioria ba agrikultura no turizmu komunitáriu. Programa hirak-ne’e aprezenta husi kada suku sanulu (10) iha Postu Vikeke Vila nune’e prosesu votasaun asembleia programa hitu mak hetan ona aprovasaun,” nia tenik.
Nia dehan, programa ba tinan 2027 nian ne’ebé hetan ona aprovasaun husi ASPA Vikeke Vila nian, iha fulan-Maiu sei aprezenta planu sira-ne’e ba Autoridade Munisípiu Vikeke hodi diskute iha Konsellu Konsultivu Munisipál Vikeke hodi ta’is programa prioridade sira-ne’ebé maihusi postu sira.
Kona-ba programa prioridade hitu ne’ebé ASPA Vikeke Vila aprova inklui programa adisional sira mak hanesan husi Suku Uma-Ua’in Kraik irrigasaun ba natar We’e Fafulu no Aidak-Sari Bulak, Suku Luka konstrusaun bendungan ba natar Wedare Badak no Wedare Naruk, Suku Bahalaraua’in konstrusaun Estrada ba fatin turizmu komunitária kilómentru neen (6), suku Uaimori konstrusaun foun no barajen ba uma komunidade iha área Uaisesurai, suku Fatudere harii fatin turizmu komunitáriu iha tasi ibun, Suku Maluru dezenvolve fatin turizmu komunitária, harii sentru formasaun ba feto kriatividade no Suku Karaubalu turizmu relijiozu Gruta Ulukleu-rua inklui uma fatin ba retiru, morru hale’u fatin turizmu relijiouzu metru 2000 no fatin ba siguransa.
Nune’e mós, planu adisionál sira hanesan Suku Bibileo atu sosa ambulánsia ba tula moras husi suku mai munisípiu, hadi’a edifísiu Konsellu Kombatene Libertasaun Nasionál (KKLN) no morru hale’u, harii sentru multifunsaun ba juventude hotu iha munisipiu no harii sentru espesífiku ba feto no ema ho defisiénsia kompleta rampa iha edifísiu sira inklui mós iha sede suku sira.
Jornalista: Vitorino Lopes da Costa
Editór: Xisto Freitas da Piedade
