g7+ aprezenta operasionalizasaun Sentru Konsulta Rapidu g7+ ba Vise MNEK Liberia
LIBERIA, 17 Marsu 2026 (TATOLI)-Sekretáriu Jerál g7+, Helder da Costa, akompaña hosi Adjuntu Sekretáriu Jerál, Habib Mayar no ekipa, tersa ne’e, aprezenta ba Vise Ministra Negósiu Estranjeiru no Kooperasaun Liberia Ethel Davis, kona-ba operasionalizasaun sentru konsulta rapidu g7+ ka g7+ Rapid Response Advisory Centre.
Adjuntu Sekretáriu Jerál g7+, Habib Mayar ba Ajénsia TATOLI, hateten Vise-MNEK Liberia apresia ho aprezentasaun kona-ba Rapid Response Advisory Centre no iha interese sei servisu hamutuk ho organizasaun g7+ iha programa referidu.
“Programa ida ne’e mosu tanba nasaun membru g7+ barak mak hetan dezafiu iha faze negosiasaun ho koorporasaun internasionál teknikamente no finansialmente, programa ida ne’e sei fó asistensia gratuita ba nasaun membru sira ne’ebé hetan dezafiu iha área sira ne’e,” dehan Habib Mayar iha Monrovia, Liberia.
Tuir nia Sentru Konsulta Rápidu maka inisiativa soberanu pioneiru ida ne’ebé dezeña atu forñese apoiu imediatu no prátiku ba estadu-membru g7+ ne’ebé hasoru asuntu urjente sira ho importánsia nasionál.
Sentru Konsultivu ba resposta rápida sei forñese orientasaun lalais no prátiku hosi asesór eminente sira hodi permite governu g7+ sira atu atua ho desizivu iha faze inisiál krítiku sira hosi dezafiu nasionál ida.
No mós sei forñese apoiu krítiku ba Estadu-membru sira partikularmente iha relasaun ho disputa internasionál boot sira no negosiasaun konsesaun ho risku aas ne’ebé envolve rekursu naturál sira no projetu infraestrutura sira.
Sentru prienxe lakuna ida ne’ebé maka kleur ona iha área apoiu internasionál nian hodi fó prioridade ba asisténsia ne’ebé lalais, peritu, no sensivel ba kontestu bainhira presiza liu.
Sekretariadu g7+, maka sei lidera Sentru Resposta Lalais hodi koordena estratéjia, admisaun, no prestasaun servisu sira.
Enkuantu, Estadu-membru sira sei bele asesu ba apoiu Sentru nian ba asisténsia imediata lahó kustu, ho asisténsia iha tranzisaun ba arranju sira asesoria esterna nian ba tempu naruk liuhosi lista péritu sira ne’ebé iha reputasaun internasionál iha lei, ekonomia no dezenvolvimentu.
Fundasaun g7+, organizasaun la’ós lukrativu ida ne’ebé apoia misaun g7+ nian, kompromete ona atu tulun iha serbisu inisiál sentru idą ne’e nian
Entertantu, iha loron 23 fulan-Setembru tinan 2025, g7+ lansa nia Sentru Konsultivu ba Resposta Rápida ne’ebé inovativu. Desizaun ne’e foti iha simeira anuál g7+ ne’ebé hala’o iha marjen Semana Nivel Aas Asembleia Jerál Nasaun Unida nian iha Nova Iorke.
Sentru Konsultivu Resposta Rápida maka inisiativa soberanu pioneiru ida ne’ebé dezeña atu fornese apoiu imediatu, prátiku ba Estadu-membru g7+ ne’ebé hasoru asuntu urjente sira ho importánsia nasionál.
Jornalista : Jogerjo Guterres
Editór : Florencio Ximenes
