DILI, 18 Marsu 2026 (TATOLI)—Antigu Xefe kaza Sivíl Prezidénsia Repúblika, Jesuína Maria Gomes Fereira, kuarta ne’e, entrega termu servisu ba Xefe Kaza Sivíl foun Henriqueta Maria da Silva ho nia adjunta Graziela Fátima Liu Soares.
“Ida-ne’e foin primeiru ami halo iha Palásiu Prezidensiál entrega servisu ba malu, xefe Kaza Sivíl sesante entrega servisu mai ha’u no ha’u entrega ha’u-nia servisu antes ne’e ba adjunta. Ita halo hanesan ne’e hodi mantein rítmu sira hanesan ne’e iha Palásiu Prezidensiál ne’e ba oin,” Henriqueta hateten ba jornalista sira bainhira ramata entrega servisu ba malu iha Palásiu Prezidensiál Nicolau Lobato, bairru Pite, ohin.
Nia dehan, sei kontinua nafatin servisu hotu ne’ebé Xefe Kaza Sivíl sesante halo ona hodi tuir vizaun Palásiu Prezidensiál nian.
“Ita sei hala’o nafatin servisu sira, tranzmite nafatin vizaun Palásiu Prezidente nian, programa importante sira tradús polítika no vizaun Prezidente Repúblika nian, ida-ne’e mak ita sei kontinua nafatin. Ita sei la halo tan buat foun, anaunser iha instrusaun ruma husi ita-nia Prezidente Repúblika,” Henriqueta dehan.
Iha fatin hanesan, Xefe Kaza Sivíl sesante no atuál Vise-Ministra Negósiu Estranjeiru no Kooperasaun (MNEK), Jesuína Gomes, hateten entrega termu servisu ne’e importante tebes ba instituisaun públika no privada sira.
“Ida-ne’e atu hatudu katak maske mudansa ema, maibé tenke asegura funsionamentu hotu instituisaun nian, ho nune’e mak troka termu servisu ne’e importante tebes,” Jesuína hateten.
Nia hatutan, Xefe Kaza Sivíl foun ho nia adjunta la’ós ema foun iha Palásiu Prezidensiál maibé servisu nanis ona iha fatin referida.
“Xefe Kaza Siví foun ho nia adjunta la’ós ema foun, sira na’in-rua servisu nanis ona ho ha’u iha ne’e, hanoin sira komprinde ona buat barak ne’ebé liga ho sistema no prosedimentu ne’ebé ita kria ona durante ne’e hanesan jestaun finansa, jestaun patrimoniu, jestaun rekursu umanu. Hirak ne’e ita halo atu reforsa Prezidente Repúblika tanba ita-nia prezidente rasik hakarak Palásiu Prezidensiál sai ezemplár ba instituisaun sira seluk,” Jesuína dehan.
Ho nune’e, nia husu ba Xefe Kaza Sivíl foun ho Adjunta atu servisu maka’as hodi implementa programa lubuk ida-ne’ebé sei akontese iha tinan ida-ne’e.
“Tinan ida-ne’e iha servisu lubuk ida-ne’ebé mak presiza halo no haree didi’ak, tenke halo tuir liuliu ba orsamentu atu nune’e atu asegura nia ezekusaun bele atinje nia pursentu hanesan tinan rua (2) ba kotuk. Iha tinan 2024, ita-nia persentajen iha 96%, iha tinan 2025 98%, entaun tenke asegura nafatin para Prezidensia nia ezekusaun ne’e tuir Planu Asaun Anuál ne’ebé iha ona,” nia dehan.
Nia subliña, maske muda ona ba Vise-MNEK maibé prontu apoiu nafatin servisu sira ne’ebé Xefe Kaza Sivíl foun ho nia Adjunta prezisa atu tulun, liuliu servisu tékniku sira kona-ba orsamentu no seluk tan.
Jornalista : Hortencio Sanchez
Editór : Cancio Ximenes
