DILI, 18 Marsu 2026 (TATOLI)—Governu liuhusi Ministériu Asuntu Kombatente Libertasaun Nasionál (MAKLN) no Konsellu Kombatente Libertasaun Nasionál (CCLN-sigla portugeza) kontinua prosesa reklamasaun no kontestasaun 61.711, no tuir planu sei konklui iha tinan ne’e.
“Iha 2026 ida-ne’e tenke fó solusaun. La hotu, maibé 50% hosi kontestasaun no reklamasaun tenke fó. Asuntu ida-ne’e tenke konklui iha tinan ida-ne’e. Razaun tanba saida mak tenke konklui, ha’u ministru, ha’u membru Governu administrativamente jere, inklui jere to’o osan. Labele hanoin dehan osan Estadu nian ne’ebé kualker ita ida mai dehan Estadu nian ne’e fó de’it,” Ministru “Oan Soru” haktuir iha enkontru entre estrutura MAKLN iha salaun Três de Março Maubai, Komoro, Kuarta ne’e.
Dadus reklamadu no kontestadu ne’ebé rejistadu iha sistema baze dadus hamutuk 61.711, ne’ebé mak kompostu hosi kontestasaun hamutuk 30.000-resin no restu ne’e maioria reklamasaun. Dadus hirak-ne’e maihosi kombatente rejistadu dahuluk 2003 to’o 2005 inklui kombatente rejistudu daruak 2009.
Ministru Oan-Soru hatutan rezultadu hosi desizaun ne’e, seidauk finaliza, tanba nia progresu foin mak atinje pursentu haat-nulu resin (40%-resin). Nune’e maka liuhosi reuniaun institusionál ohin, desizaun forum deside ona katak iha fulan-Maiu mak foin halo filafali desizaun finál.
Lista reklamasaun iha 61.711 no kontestasaun hamutuk 53.272. Hosi ne’e kompostu husi munisípiu Aileu ba kontestasaun iha 3.179 no reklamasaun iha 2.822, Ainaru kontestasaun iha 5.666 no reklamasaun iha 4.023, Baukau kontestasaun iha 9.332 no reklamasaun iha 8.459, Bobonaru kontestasaun iha 6.757 no reklamasaun iha 5.939, Kovalima kontestasaun iha 5.237 no reklamasaun iha 4.806, Dili kontestasaun iha 2.825 no reklamasaun iha 2.375, Ermera kontestasaun iha 8.566 no reklamasaun iha 7.214, Lautein kontestasaun iha 2.677 no reklamasaun iha 2.460, Likisá kontestasaun iha 1.835 no reklamasaun iha 1.556, Manatutu kontestasaun iha 3.635 no reklamasaun iha 3.391, Manufahi kontestasaun iha 3.419 no reklamasaun iha 3.202, Oekusi kontestasaun iha 3.112 no reklamasaun iha 2.736 no Vikeke kontestasaun iha 5.449 no reklamasaun iha 4.268 no laiha munisípiu kontestasaun hamutuk haat (4) no reklamasaun iha tolu (3) no Fora Timor-Leste hamutuk 18.
Lista reklamasaun no kontestasaun ne’ebé rejistu ona Kombatente Libertasaun Nasionál ne’ebé deside ema hamutuk 22.017, kompostu Aileu iha 1.420, Ainaru iha 1.603, Baukau 1.532, Bobonaru 1.991, Kovalima iha 1.203, Dili iha 1.627, Ermera iha 2.149, Lautein iha 1.209, Likisá iha 2.945, Lautein iha 1.880, Manatutu iha 1.380, Manufahi iha tolu (3) no fora husi Timor-Leste hamutuk 18.
Jornalista: Osória Marques
Editór: Xisto Freitas da Piedade
