DILI, 18 Marsu 2026 (TATOLI)—Vise-Ministra ba Asuntu ASEAN, Milena Rangel, halo aprezentasaun ida iha reuniaun Konsellu Ministru kona-ba kalendáriu reuniaun ASEAN Senior Oficial’s Meeting (SOM) Leader’s nian neʼebé Timor-Leste sei partisipa iha fulan-Marsu no fulan-Abríl tinan 2026.
Governante ne’e aprezenta ona objetivu prinsipál sira husi partisipasaun sira-ne’e liuliu reforsu kooperasaun rejionál, hametin parseria estratéjikua no konsolidasaun prezensa Timor-Leste nian iha mekanizmu koordenasaun polítika, ekonómika no seguransa ASEAN.
Vise-Ministra ba Asuntu ASEAN, Milena Rangel, hateten kalendáriu ne’e enkontru bilaterál ida entre Timor-Leste ho Reinu Unidu iha United Kingdom, tanba Reinu Unidu sai hanesan parseria diálogu ASEAN nian dezde tinan 2021.
“Entaun, sira estabelese ona mekanizmu ida bolu dehan dialogue partnership meeting no reuniaun agora ne’e ba ASEAN SOM leaders, nune’e ha’u hanesan lideransa Senior Oficial’s Meeting (SOM) Timor-Leste tenke ba partisipa enkontru ida-ne’e,” Vise-Ministra informa ba Agência Tatoli liuhusi telefónika, ohin.
Enkuantu, Governante ne’e hatutan kalendáriu daruak nian nian mak mak enkontru bilaterál ho Indía iha Filipina, tanba sira-nia diálogu parseria ne’e estabelese kle’ur ona entaun kada tinan sempre iha enkontru.
“Nune’e, objetivu Timor-Leste nia partisipa atu haree parséria sira-nia planu asaun durante tinan lima, no ita sei halo diskusaun ho sira katak saida mak apropriadu ba ita-nia rai,” nia esplika.
Kalendáriu datolu nian bainhira atu tama ona ba simeira Xefe Ezekutivu sira-nia sumit ka lideransa sira sei hasoru malu, tanba ne’e iha fulan-Abríl ne’e sira ba halo reuniaun tiha hafoin iha fulan-Maiu Primeiru-Ministru sumit iha Filipina, hodi ko’alia kona-ba prosesu Timor-Leste nia integrasaun ne’ebé sei haree liubá ita-nia implementasaun ba roteiru pós-adezaun tinan rua no adezaun ba tinan lima.
“Konsertezamente ida-ne’e mós sei fó biban ba Timor-Leste ne’e sei Prezidénsia ASEAN iha tinan 2029, se lae ita tenke kumpre ona ita-nia rekezitu no preparasaun ba Timor-Leste atu sai uma na’in iha ASEAN ne’e, entaun ha’u tenke relata ita-nia progresu tanba ne’e mak ita harii ona konsellu nasionál,” nia dehan.
Jornalista : Alexandra da Costa
Editór : Cancio Ximenes
