PDHJ organiza diálogu kona-ba ratifikasaun protokolu fakultativa ba konvensaun kontra tortura
DILI, 18 Marsu 2026 (TATOLI)–Provedoria Direitu Umanu no Justisa (PDHJ) hamutuk ho sosiedade sivil hanesan Asia Justisa And Right (AJaR), Fórum Organizasaun Naun Govermentál Timor-Leste (FONGTIL) no Komisaun Antí-Korrupasaun (CAC) organiza diálogu ho Parlamentu Nasionál (PN) hodi ko’alia kona-ba asuntu prevensaun tortura no Ratifikasaun Protokolu Fakultativa ba konvensaun kontra tortura (OPCAT).
Provedór Direitu Humanu no Justisa, Virgílio da Silva Guterres ‘Lamukan’, husu ba órgaun lejizladór hanesan PN atu halo ratifikasaun ba konvensaun kontra tortura.
“Iha tinan-tolu liubá bainhira Prevedór ba hato’o relatóriu iha Parlamentu Nasionál, husu para halo ratifikasaun ba konvensaun ida-ne’e. Tanba ne’e, ohin ita halo diálogu, nune’e ba oin ita sei lori instrumentu ida-ne’e hodi ba ratifika iha Parlamentu,” Provedór hato’o iha Timor Plaza, Kuarta ne’e.
OPCAT importante atu fó hatene ba ema hotu katak labele halo torturasaun ba ema ida.
“Konvensaun ida-ne’e ita iha ona no Prevedoria Direitu Umanu no Justisa ne’ebé halo knaar bazeia ba mandatu Konstituisaun hakarak ka lakohi kuandu haree lei ne’ebé importante liga ba ema-nia bele halo pedidu ba Parlamentu atu husu ratikasaun ba konvensaun,” nia akresenta.
Notísia relevante : KM aprova ratifikasaun MoU entre TL-Austrália iha kooperasaun téknika ba dezenvolvimentu
Iha sorin seluk, PN simu hanoin sira husi PDHJ atu halo ratifikasaun ba konvensaun prevensaun tortura no ratifikasaun ba protokolu fakultativa ba konvensaun kontra tortura.
“Parlamentu Nasionál mós hatama pedidu husi Prevedoria Direitu Umanu no Justisa ba ratifikasaun ida-ne’e, la’ós de’it Parlamentu Nasionál, maibé Prezidénsia Repúblika no Governu mós aseita atu halo ratifikasaun,” nia katak.
Iha fatin hanesan, membru Komisaun A ne’ebé trata asuntu lei no justisa PN, António Verdial, hateten, parte PN sempre prontu, kuandu PDHJ lori ba PN atu ratifika ne’e sempre prontu atu apoia.
Nia promete sei enkoraja Komisaun A hodi aselera ratifikasaun ba konvensaun lei torturasaun.
Nune’e mós, Komisáriu Organizasaun Nasaun Unida (ONU) ba Direitu Umanus Justisa ba Rejiaun Ázia, Arnaud Chaltin, apresia ba PDHJ Timor-Leste ne’ebé iha inisiativa di’ak hodi fó importánsia halo ratifikasaun ba asuntu ne’e.
“Apresia tebes ba PDHJ nia inisiativa ne’ebé hahú ko’alia ho Parlamentu Nasionál atu ratifika instrumentu ba konvensaun kontra tortura,” nia hato’o.
Jornalista : Natalino Costa
Editora : Julia Chatarina
