BCTL sei aprezenta análize ekonómika 2025 ho diskusaun kona-ba estratéjia ekonómiku nasionál
DILI, 19 Marsu 2026 (TATOLI) – Banku Sentrál Timor-Leste (BCTL, sigla portugés) sei lansa Relatóriu Dezempeñu Ekonómiku Timor-Leste 2025 iha 23 Marsu 2026, iha Sentru Konvensaun Dili.
Lansamentu ne’e sei akompaña ho diálogu entre setór públiku no privadu hodi diskute estratéjia sira hodi dudu kreximentu ekonómiku nasionál.
Eventu ne’e organiza Governu, liuhusi Ministériu Koordenadór ba Asuntu Ekonómiku (MAKE), BCTL, no Kámara Komérsiu no Indústria Timor-Leste (CCI-TL), ho tema “Timor-Leste: Hasoru Kreximentu Ekonómiku ne’ebé Lidera husi Setór Privadu”.
“Inisiativa ne’e hakarak aprezenta análize ida husi dezempeñu ekonómiku nasionál nian, enkuantu kria espasu ida ba troka hanoin sira entre instituisaun públika sira, autór emprezariál sira, no parte interesada sira seluk”, haktuir dokumentu ne’ebé Tatoli asesu, ohin.
Diskusaun ne’e sei foka ba medida sira atu hametin diversifikasaun ekonómika, enkoraja investimentu, apoia atividade emprezariál, no kria kreximentu sustentavel.
Serimónia ne’e sei partisipa husi Primeiru-Ministru, Xanana Gusmão, Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, Governadór BCTL, Hélder Lopes, no Prezidente Kámara Komérsiu Timor-Leste (CCI-TL), Jorge Serrano.
Iha diskusaun loron tomak, sesaun oioin sei envolve membru Governu sira, reprezentante sira husi instituisaun públika no setór privadu sira.
Tópiku sira ne’ebé sei ko’alia iha sesaun dahuluk mak planeamentu estratéjiku ba investimentu, reforma ekonómika, transformasaun setór agríkola ba ekonomia produtiva, garante serteza jurídika ba investimentu, polítika fiskál no reforma tributária, no seguransa nasionál no kontrolu fronteira hodi apoia klima negósiu nian.
Sesaun sira tuirmai sei diskute reforma estruturál sira hodi apoia ekonomia modernu ida, inklui dezenvolvimentu infraestrutura no lojístika dijitál, jestaun rekursu naturál sustentavel, dezenvolvimentu infraestrutura, no polítika sira dezenvolvimentu komérsiu no industriál.
Iha sesaun datoluk ne’e halo diskusaun foka liu ba finansiamentu no promosaun investimentu, kobre integrasaun ekonómika Timor-Leste nian iha ASEAN, promosaun investimentu no esportasaun, dezenvolvimentu sistema finanseiru ba diversifikasaun ekonómika, no finansiamentu ba empreza ki’ik no médiu no empreendedorizmu, inklui liuhusi Banku Nasionál Komérsiu Timor-Leste.
Série atividade sira sei inklui mós sesaun interativu sira pergunta no resposta nian no diskusaun nakloke sira entre partisipante sira. “Hein katak sei hamosu input konkretu sira hodi hametin papél setór privadu nian iha dezenvolvimentu ekonómiku nasionál”, nota ne’e salienta.
Jornalista: Arminda Fonseca
Editora: Maria Auxiliadora
