DILI, 19 Marsu 2026 (TATOLI)-Komisaun Nasionál Eleisaun (CNE, sigla portugés) enkoraja feto sira atu partisipa iha eleisaun podér lokál ne’ebé tuir planu Governu atu realiza iha tinan 2027 ba munisípiu sira ne’ebé prienxe ona kondisaun mínima.
Komisária CNE, Odete Maria Belo, hato’o apelu ne’e bainhira sai oradora iha seminária ho tema ‘Prespetiva no Papél Feto iha Prosesu Desentralizasaun iha Munisípiu Dili’’, iha salaun Delta Nova, ohin.
Nia enkoraja feto sira atu prepara hodi kandidata-an ba iha eleisaun kámara munisipál hanesan Prezidente no Vise-Prezidente Kámara Munisipál ne’ebé nu’udar órgaun deliberativu sei reprezenta populasaun husi munisípiu sira ho ninia knaar define no ezekuta polítika públika munisípiu nian no eleisaun asembleia munisipál ba deputadu lokál, ne’ebé tuir lei define ona lista kada kandidatu ne’e iha feto hodi promove igualdade jéneru.
CNE kontinua halo edukasaun sívika hodi divulga Lei Eleisaun Munisipál atu eleva koñesimentu feto sira-nian hodi partisipa másima iha eleisaun. “Ita ko’alia kona-ba feto, eleisaun ne’e feto atu kandidata an no ita enkoraja sira bele mós partisipa másima hodi kompete ho mane”, dehan.
CNE parseria ho Sekretaria Estadu Igualdade, feto pontensiál, Organizasaun Naun-governamentál Caucus, autoridade lokál, hodi divulga lejizlasaun no fahe informasaun hodi enkoraja feto sira. “Dalabarak feto laiha informasaun no dalaruma lakohi kandidata sira-nia an, tanba iha dezafiu barak”, nia realsa.
Lei númeru 3/2016 kona-ba Podér Lokál no Desentralizasaun Administrativa ho nia objetivu prinsipál mak hametin demokrásia lokál, povu bele partisipa iha tomada desizaun, hasa’e efisiénsia servisu públiku, promove dezenvolvimentu ekonómiku no sosiál, munisípiu bele planeia dezenvolvimentu tuir realidade rasik, hamenus sentralizasaun iha kapitál no aumenta transparénsia no responsabilidade.
Jornalista: Nelson de Sousa
Editora: Maria Auxiliadora
