DILI, 19 Marsu 2026 (TATOLI)—Komisaun Nasionál Eleisaun (CNE-sigla portugeza) hamutuk ho Ministériu Administrasaun Estatál (MAE), Kinta ne’e, konsolida demokrasia no integridade eleisaun liuhusi edukasaun sívika ba partidu polítiku sira atu prepara ba eleisaun kámara munisipál iha 2027.
Objetivu hosi atividade sensibilizasaun edukasaun sívika ba partidu polítiku sira atu oinsá bele hatudu ba eleitorál ka nia militante sira oinsá hasoru eleisaun kámara munisipál iha 2027.
Prezidente Komisaun Nasionál Eleisaun, José Agostinho Belo hateten atividade ida-ne’e hanesan programa ida ba munisípiu hotu-hotu, tanba atu tama podér lokál entaun partidu polítiku nia papél importante mak oinsá sensibiliza informasaun liliu edukasaun sívika ba nia militante no partisipante liliu komunidade.
“Liuhusi enkontru ida-ne’e foka ba edukasaun sívika ba partidu polítiku para fásil liu hodi halo preparasaun atu simu eleisaun ne’ebé sei mai. Tanba ne’e mak ita konvida mós Prezidente Autoridade Munisípiu Dili hodi esplika kona-ba kondisaun mínima liliu infraestrutura iha Munisípiu Dili,” Prezidente CNE dehan ba jornalista sira iha salaun Apuramentu CNE, Kolmera, Dili, Kinta ne’e.
Prezidente CNE dehan sensibilizasaun ida-ne’e ba partidu hotu-hotu iha Munisípiu Dili no sei kontinua ba munisípiu sira seluk.
Entretantu, Prezidente Autoridade Munisípiu Dili, Francisco dos Santos, informa tinan oin Governu hahú ona implementa podér lokál no desentralizasaun administrativa iha nivel munisipál, no Autoridade Munisípiu Dili prontu simu.
“Ita atu hakat ba podér lokál ne’e maibé buat ne’ebé ita preokupa mak infraestrutura maibé ita prontu simu podér lokál. Dezafiu boot mak infraestrutura rasik. Ita-nia edifísiu asembleia nian seidauk iha no edifísiu ba munisipál Dili rasik ladún favoravel ona tanba edifísiu antigu. Ida-ne’e ami hato’o ona ba parte nasionál. Espera katak iha tempu badak bele halo konstrusaun edifísiu Asembleia maibé edifísiu Munisípiu Dili nian iha ona prosesu nia laran,” nia dehan.
Iha biban ne’e, Segundu Vise Koordenadór PLP, Munisípiu Dili, Lúcio Freitas dehan edukasaun sívika tenke kontinua ba partidu polítiku sira oinsá bele hatudu ba eleitorál iha territóriu.
“Edukasaun sívika ne’ebé CNE oferese ne’e importante tebes ba ami partidu polítiku sira atu oinsá ita bele hala’o tuir regra ne’ebé iha no liuhusi edukasaun sívika ne’e bele konsensializa ami para oinsá labele komete iha krime eleitorál iha prosesu eleisaun ne’ebé sei mai,” nia dehan.
Nune’e mós, Vise-Koordenadór FRETILIN Munisípiu Dili, Paulo de Jesus “Daegae”, hateten ida-ne’e oinsá hanorin eleitór sira vota iha eleisaun, entaun edukasaun sívika ne’e presiza to’o nivel aldeia, suku no postu sira.
“Atu partisipa iha kámara munisipál ne’e ami partidu FRETILIN prontu tanba daudaun ne’e ami hahú ona halo konsolidasaun iha munisípiu liuliu iha baze. Tanba ne’e, ohin ami mai hodi tuir edukasaun sívika ne’ebé CNE oferese mai ami. Ida-ne’e importante no CNE presiza sensibiliza to’o baze,” nia tenik.
Iha sorin seluk, Koordenadór CNRT Munisípiu Dili, Luís Ximenes hateten partidu CNRT hetan konvite hosi CNE hodi mai partisipa formasaun konsolida demokrasia no integridade eleisaun nian.
“Ida-ne’e atu prepara ba eleisaun kámara munisipál nian. Tanba ne’e, liuhusi atividade ida-ne’e bele konsolida edukasaun sívika, no ami hahú prepara no forma ona ami-nia grupu ba hasoru eleisaun ne’ebé sei mai,” nia haktuir.
Enkuantu, Koordenadór Partidu KHUNTO Munisípiu Dili, Mário Cobra dehan presiza edukasaun sívika ba partidu polítiku sira, tanba liuhusi edukasaun sívika mak eleitór sira bele ezerse sira-nia direitu ho loloos no justu.
“Maibé, ami preokupa mak iha eleitór balun ne’ebé mate ona maibé ninia eleitorál nafatin ativu. Ida-ne’e CNE presiza tau-atensaun ba asuntu ida-ne’e,” nia fó-hanoin.
Jornalista: Osória Marques
Editór: Xisto Freitas da Piedade
