DILI, 19 Marsu 2026 (TATOLI)—Embaixadór Indonézia iha Timor-Leste, Okto Dorinus Manik, sei hala’o fali ninia misaun diplomata iha Papua Noba Giné, hafoin termina ninia mandatu durante tinan haat-resin iha Timor-Leste.
Tanba ne’e mak ohin loron Embaixadór Indonézia ba Timor-Leste, Okto Dorinus Manik akompaña ho ninia espoza mai hasoru malu ho Primeiru-Ministru, Kay Rala Xanana Gusmão, hodi halo despedida ba terminasaun ninia mandatu iha Timor-Leste.
“Ohin loraik ne’e, ha’u hasoru Primeiru-Ministru Xanana Gusmão, akompaña ho ha’u-nia espoza hodi despedida ikus ho Xanana Gusmão kona-ba ami-nia amizade durante tinan haat-resin iha Timor-Leste,” Embaixadór informa ba jornalista sira iha Palásiu Governu, ohin.
Órgaun diplomata dehan ida-ne’e hanesan esperiénsia no amizade ne’ebé la’ós komun bainhira durante ne’e nia servisu iha Timor-Leste, tanba ne’e nia sei lahaluha oinsá komunidade Timor-Leste nia kooperativu, dame, ne’ebé apoiu di’ak sira-nia servisu durante sira iha ne’e, nune’e halo nia laran monu ba Timor.
Enkuantu nia informa katak durante ninia mandatu programa ne’ebé progresivu mak hanesan forma kooperasaun entre Indonézia ho Timor-Leste, iha kooperasaun oioin liga ba polítika, ekonomia, sosiál, kultura, interasaun sosiál no mós investimentu husi setór privadu hanesan pertamia internasionál banku Mandiri, BRI, Telkomsel, no mós Utama Karya ne’ebé partisipu ba dezenvolvimentu infraestrutura.
“Entaun ho prezensa husi setór privadu Indonézia nian bele kontribui ekonomia, sira la’ós hetan de’it lukru maibé kontribui konstrutivu nasaun nian,” nia esplika.
Jornalista : Alexandra da Costa
Editór : Cancio Ximenes
