DILI, 19 Marsu 2026 (TATOLI)—Primeiru-Ministru, Kay Rala Xanana Gusmão, atualiza apoiu husi Governu ba inisiativa tolu mai-husi Prezidente Repúblika, José Ramos-Horta, ne’ebé kompostu husi realizasaun Maratona Internasionál tinan 2026, Simeira Siénsia ba Dezenvolvimentu iha Timor-Leste no Natál ho Povu.
Primeiru-Ministru atualiza apoiu ne’e liu-husi reuniaun semanál ho Xefe Estadu iha Palásiu Prezidensiál Nicolau Lobato, Bairru Pite, kinta (19 Marsu 2026) ne’e.
“Importante-liu mak horisehik Konsellu Ministru diskute kona-bá inisiativa tolu hosi Prezidente Repúblika, José Ramos-Horta to’o fim tinan 2026. Ami ko’alia nu’udár instituisaun Governu sei fó apoiu tomak ba inisiativa ne’ebé kapaas tebes,” PM Xanana hateten.
Simeira Siénsia bá Dezenvolvimentu sei konvida Laureadu Nobel bá Páz nian hodi ko’alia kona-ba páz iha mundu ne’ebé ohin loron domina ho funu.
Antes ne’e Prezidente Repúblika propoin ona kona-ba selebrasaun aniversáriu Comunidade dos Países de Língua Portuguesa (CPLP) ba da-30 atu hala’o iha Lisboa, maibé Ministru Negósiu Estranjeiru no Kooperasaun (MNEK), Bendito dos Santos Freitas, hateten sei diskute hela no selebrasaun ne’e sei halo de’it iha kada nasaun membru.
Xefe Governu mós informa ba Prezidente Repúblika katak, Konsellu Ministru fó apresu boot tebe-tebes ba Ernst & Young ne’ebé finaliza ona auditoria forense, ne’e katak auditoria ne’ebé haree ba sala hotu-hotu iha irregularidade oinsá bele aprezenta dadus kompletu kona-ba saida mak akontese iha aspetu tékniku, polítiku, institusionál liuliu aspetu korrupsaun.
Atualiza mós ba Prezidente Repúblika kona-bá presu mina ne’ebé daudaun ne’e sa’e kauza husi funu iha médiu oriente maibé la’ós sa’e ida a’as-liu.
Tanba ne’e, Ministru Petróleu no Rekursu Minerál, Francisco da Costa Monteiro atualiza ona ba Konsellu Ministru hamutuk ho importadór sira sei haree nafatin oinsá garante to’o tinan nia rohan.
Iha oportunidade ne’e, atualiza ba Prezidente Repúblika kona-ba vizita servisu Primeiru-Ministru nian iha munisípiu sira kona-ba preparasaun ba implementasaun polítika desentralizasaun podér lokál.
Konsellu Ministru hala’o sorumutu iha Palásiu Governu, Dili, no analiza konkluzaun ba auditoria forense ne’ebé hala’o hosi EY Portugál kona-bá prosesu akizisaun no jestaun aviaun Twin Otter no mós konstrusaun ró Haksolok, ne’ebé hala’o husi Autoridade Rejiaun Administrativa Espesiál Oekusi Ambeno (RAEOA).
EY Portugál halo parte iha rede internasionál Ernst & Young, organizasaun servisu profisionál ida-ne’ebé boot liu iha mundu, ho esperiénsia hodi hala’o auditória ba entidade públika no privada sira.
Jornalista : Hortencio Sanchez
Editór : Cancio Ximenes
