DILI, 19 Marsu 2026 (TATOLI)—Millenium Challenge Account (MCA) Timor-Leste liuhusi Projetu TALENT (Teaching and Learning for the Next Generation of Timorese) ofisialmente entrega asset (patrimóniu) ba Ministériu Edukasaun (ME) hodi garante apoiu kontínuu ba setór tékniku no sekundáriu sira.
Asset sira-ne’ebé entrega ona ba Ministériu Edukasaun ne’e ho nia valór orsamentu hamutuk $349,828.37. Projetu TALENT parte ida hosi kolaborasaun entre Governu Timor-Leste no Millenium Challenge Coorporation (MCC), lansa inisiál iha loron 19 Jullu 2022, ho orsamentu millaun $40.2. Ida-ne’e ho objetivu atu hasa’e kualidade hanorin, lideransa eskolár, profisiénsia iha lian, no abilidade TIC ba profesór sira iha eskola sekundária jerál no tékniku-vokasionál hotu-hotu iha Timor-Leste.
Maibé, iha Novembru 2025, Governu Estadu Unidu deside hakotu projetu ne’e, entaun atu agarante sustentabilidade, transfere patrimóniu projetu ba Ministériu Edukasaun hodi kontinua apoia formasaun profesór sira no atividade edukasionál sira.
Diretór Ezekutivu MCA-Timor-Leste, Constâncio da Conceição Pinto haktuir katak patrimóniu ne’ebé Ministériu Edukasaun simu kompostu husi laptop, veíkulu no meza.
Notísia relevante: Milennium Challenge Account Timor-Leste entrega asset ba MESSK
“Ha’u hein katak ME bele utiliza patrimóniu no dokumentu sira-ne’ebé ami prepara ona hodi apoia ninia argumentu orsamentál sira, liuliu tanba estudu anteriór sira hatudu ona dezafiu signifikativu sira iha setór edukasaun, partikularmente iha ensinu sekundáriu, relasiona ho alfabetizasaun, numerasaun no dezenvolvimentu soft skills. Asuntu sira-ne’e hotu identifika ona ho kle’an. Tanba ne’e, ho asset ne’e bele garante kualidade ensinu iha ensinu sekundáriu tékniku vokasionál no ensinu sekundáriu,” nia dehan ba jornalista sira iha Ministériu Edukasaun, Vila-Verde, Kinta ne’e.
Patrimóniu ne’ebé semiliár fahe mós ba Ministériu Ensinu Superiór, Siénsia no Kultura (MESSK) no Bee Timor-Leste (BTL) ho valór $200.000 no $120.000.
Projetu TALENT marka signifikativa ida iha reforsu ensinu sekundáriu iha Timor-Leste, partikularmente iha dezenvolvimentu literasia, numerasia no soft skills estudante sira-nian. Ho transferénsia patrimóniu ne’e, governu afirma ninia kompromisu atu mantein kualidade ensinu sekundáriu no tékniku, hodi loke oportunidade ba futuru ida-ne’ebé inkluzivu no ho kualidade aas-liu.
Iha fatin hanesan, Ministra Edukasaun, Dulce de Jesus Soares subliña importánsia hosi sasán sira hanesan mobiliáriu eskola nian, ekipamentu IT no veíkulu sira atu apoia ensinu no administrasaun eskola nian.
“Sasán-sira ne’e la’os prezente de’it, maibé instrumentu esensiál hodi hadi’a ambiente aprendizajen, kualidade profesór no apoiu ba ensinu sekundáriu,” Dulce Soares dehan.
Ministra Dulce apresia Governu Estadu Unidu nia apoiu iha tinan hirak nia laran hanesan aprovizionamentu instrumentu arte no kulturál sira, formasaun profesór inglés nian to’o reabilitasaun eskola sira.
Entretantu, Vise Ministra Finansa (MF), Regina de Jesus Sousa hateten projetu TALENT nafatin halo-parte iha estratéjia Governu nian hodi dezenvolve kapasidade profesór no kria sentru eselente iha ensinu sekundáriu, maski termina ona projetu MCC.
“Ida-ne’e bele hatama iha planu orsamentu Governu nian tanba ita-nia profesór sira presiza iha kapasidade di’ak atu hanorin ita-nia estudante sira,” nia hateten.
Jornalista: Osória Marques
Editór: Xisto Freitas da Piedade
