DILI, 19 Marsu 2026 (TATOLI)—Prezidente Repúblika, José Ramos-Horta, kinta ne’e, iha Palásiu Prezidensiál Nicolau Lobato, fó pose ba Elisa Maria da silva nu’udar Embaixadora Reprezentante Permanente Timor-Leste ba ASEAN.
Prezidente Ramos-Horta subliña importánsia estratéjika husi papél ida-ne’e bainhira Timor-Leste konsolida ninia pozisaun iha bloku rejionál nia laran.
“Papél husi ita-nia Reprezentante Permanente iha Jakarta ne’e fundamentál tebes atu garante katak Timor-Leste, nu’udar membru ASEAN ba da-XI, nu’udar partisipante no kontribuinte ativu iha ita-nia komunidade rejionál komun,” Ramos-Horta hateten iha nia diskursu.
Xefe Estadu ne’e dehan, Embaixadora Elisa Maria da Silva lori komprensaun kle’an kona-ba mekanizmu sira ASEAN nian no lori esperiénsia diplomátika ne’ebé sei sai esensiál.
“Bainhira navega ita-nia integrasaun tomak iha pilár Komunidade tolu Polítika-Seguransa, Ekonómiku, no Sosio-Kulturál. Ha’u fiar katak nia sei reprezenta ita-nia interese nasionál sira no hametin ita-nia relasaun ho ita-nia viziñu sira iha Sudeste Aziátiku,” Horta dehan.
Nu’udar Reprezentante Permanente, Embaixadora Elisa Maria da Silva sei hala’o kna’ar nu’udar reprezentante prinsipál Timor-Leste nian ba ASEAN no membru Komité Reprezentante Permanente (CPR).
Horta hatutan, ninia responsabilidade prinsipál sira sei inklui reprezenta Timor-Leste iha enkontru sira CPR nian, halo ligasaun ho Sekretariadu ASEAN nian, no fasilita implementasaun akordu sira ASEAN nian.
Mandatu Embaxadora Elisia maka krusiál atu aproveita oportunidade estratéjiku sira husi adezaun tomak, inklui hadi’ak integrasaun ekonómika iha merkadu ho populasaun liu millaun 600, partisipasaun ativu iha diálogu seguransa rejionál, no kapasitasaun institusionál sira.
Prezidente Ramos-Horta konklui hodi reafirma Timor-Leste nia kompromisu ne’ebé boot hodi hametin ninia relasaun diplomátika globál no dezeja embaixadora Elisa Maria da Silva susesu iha ninia mandatu foun hodi serbí povu no interese Repúblika Demokrátika Timor-Leste nian.
Embaixadora Elisa Maria da Silva nia nomeasaun formaliza liuhusi Dekretu Prezidente Repúblika Nú. 35/2026. Nia substitui Embaixadora Natercia Cipriana Coelho da Silva.
Iiha okazuaun ne’e, Prezidente Ramos-Horta hato’o nia agradesimentu ba Reprezentante Permanente sesante ba ninia servisu dedikadu hodi estabelese prezensa diplomátika Timor-Leste nian iha ASEAN nia laran durante períodu krítiku integrasaun nian.
Esperiénsia badak embaixadora Elisa
Embaixadora Elisa Maria da Silva nu’udar diplomata karreira ho esperiénsia liu dékada rua iha asuntu rejionál sira. Molok hetan nomeasaun ne’e, nia hala’o kna’ar nu’udar Diretora-Jerál ba Asuntu ASEAN nian iha Ministériu Negósiu Estranjeiru no Kooperasaun.
Ninia kna’ar sira uluk iha ministériu nia laran inklui Diretora ba Pilar Komunidade Polítiku-Seguransa ASEAN nian.
Nia mós asume ona kargu signifikativu sira iha rai-li’ur, hodi hala’o kna’ar nu’udar Konsilleira iha Embaixada Timor-Leste iha Bangkok, Tailándia, ne’ebé nia mós sai nu’udar Vise Reprezentante Permanente ba Komisaun Ekonomika no Sosial Nasaun Unida nian ba Azia no Pasifiku (UNESCAP) no Enkarregada Negósiu interina husi Fevereiru 2020 to’o Janeiru 2021, iha ninia karreira inisiu, Embaixadora Elisa hanesan Primeirs Sekretária iha Embaixada Timor-Leste nian iha Canberra, Austrália (2010–2013), no Terseira Sekretária/Konsul iha Konsuladu Jerál iha Sydney, Austrália (2005–2008).
Nia hahú nia kareira iha Ministériu Negósiu Estranjeiru no Kooperasaun iha tinan 2001. Entre misaun sira iha rai-li’ur, nia okupa kargu xave sira iha Ministériu, inklui Diretora ba Protokolu no Serimónia (2014–2016) no hetan nomeasaun dala rua nu’udar Xefe-Gabinete durante períodu ne’ebá.
Molok hahú iha servisu diplomátiku, nia hetan esperiénsia folin-boot nu’udar asistente produsaun, videografia no aprezentadora televizaun ba TVTL/Unidade Informasaun Publika, OCPIO UNTAET, durante tinan 1999–2000. Nia mos servisu nu’udar intérpreter/tradutóra no asistente administrativa iha Seksaun Administrasaun UNAMET nian husi fulan Juñu to’o fulan Setembru 1999.
Ninia kualifikasaun edukasionál inklui Mestradu iha Jestaun, ho espesializasaun iha Dezenvolvimentu no Jestaun Organizasional, husi Universidade Assumption, Tailándia (2019), no Lisensiatura iha Siénsia Edukasionál UNTL, Dili, Embaixadora Elisa Maria da Silva Koalia lian Tetum, Portugues, Indonezia, no Inglés.
Jornalista : Hortencio Sanchez
Editór : Cancio Ximenes
