KOVALIMA, 19 Marsu 2026 (TATOLI)- Sentru Juventu Kovalima (CJK), fó prioridade hodi fasilita formasaun regulár ba joven sira iha munisípiu.
“Ami nia atividade implementa ba joven-sira iha Kovalima parseiru ho Ministériu Juventude Desportu Arte no Kultura (MJDAK), hodi fasilita formasaun regulár ba joven-sira”, Diretór Ezekutivu Centru Juventude Kovalima, Júlio Ferreira informa ba TATOLI iha Kampung-Baru ohin.
Dirijente CJK ne’e, dehan formasaun regulár ne’ebé mak Sentru Juventude hala’o ne’e mak hanesan, kursu komputadór, formasaun internet saudável, formasaun relasaun saudável, edukasaun sívika no edukasaun bazeia ba abilidade moris.
Formasaun regulár sira ne’e, iha inísiu 2026 foin mak hala’o formasaun komputadór daudaun-ne’e joven nain-17 mak tuir hela kursu tuir planu sei fasilita formasaun edukasaun sivika no programa sira seluk.
CJK fasilita formasaun ba joven-sira iha Kovalima tanba hetan orsamentu husi Ministériu Juventude Desportu Arte no Kultura (MJDAK) liuhusi Transferénsia Públika ho orsamentu $8,588 hodi finansia atividade formasaun regulár ba joven sira.
Orsamentu $8,588 CJK uza hodi selu insentivu ba jestór na’in haat ba tinan ne’e hamutuk $8,100 no orsamentu sira seluk uza hodi sosa ATK.
Tuir Funsionáriu ne’ebé mak presta sira-nia servisu iha Centru Juventu Kovalima hamutuk na’in haat de’it mak hanesan Diretór Ezekutivu, Jerente programa,Finansa no officer boys, Maibé ajuda mós husi programa tara no bandu na’in hitu mak ajuda hela.
Jornalista:Celestina Teles
Editór: Florencio Miranda Ximenes
