DILI, 19 Marsu 2026 (TATOLI)–Primeiru-Ministru, Kay Rala Xanana Gusmão, kinta ne’e, hala’o enkontru ho Prezidente Repúblika José Ramos-Horta hodi ko’alia kona-ba presu kombustível ne’ebé daudaun ne’e sa’e iha mundu inklui Timor-Leste, tanba akontese funu iha médiu Oriente.
Xefe Governu ne’e hatutan, ho presu konbustível ne’ebé sa’e, Konsellu Ministru ko’alia ona ho Ministru Petróleu Rekursu Minerál (MPRM) ho empreza importadór sira atu haree oinsá Governu garante Timor-Leste sei la falta kombustível to’o iha tinan ne’e nia rohan.
“Maibé, ita sei garante katak sei la falta kombustível iha tinan ida-ne’e la signifika katak ita iha garantia katak mina ne’ebé ita gasta agora ne’e la to’o iha ne’ebá, maibé pelumenus ita sei la falta mina. Ita garante mós oinsa povu sosa ne’e folin labele sa’e,” Xanana hateten ba jornalista sira hafoin hala’o enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, ohin.
Xefe Governu ne’e hatutan, funu entre nasaun sira hanesan Israel, Estadu Unidu Amerika (EUA) no Iraun mak fó impaktu ba folin kombustível sa’e, la’ós ne’e de’it maibé impaktu mós ba nesesdidade bázika nia folin.
Maibé, Xanana dehan, Governu garante buat hotu sei la’o di’ak to’o tinan ne’e nia rohan, labele falta buat ida liuliu kombustível no aihan.
Jornalista : Hortencio Sanchez
Editór : Cancio Ximenes
