PAM Aileu preokupa ho projetu estrada Seloi-Kraik ne’ebé seidauk konstrui
AILEU, 21 Marsu 2026 (TATOLI) – Prezidente Autoridade Munisípiu (PAM) Aileu, João Bosco dos Santos, preokupa ho estrada diresaun Seloi-Kraik ne’ebé lansa ona, maibé seidauk halo konstrusaun.
“Estrada diresaun Seloi-Kraik to’o Tokoluli lansa iha fulan hirak ba kotuk ne’e nia prosesu agora iha Tribunal das Contas seidauk vistu, tanba ne’e ami husu MOP atu koordena ho Tribunál das Contas, nune’e kompañia bele hahú konstrusaun estrada referida iha tinan ne’e,” Joao Bosco informa ba jornalista sira iha Aileu, ohin.
Autoridade munisipál ne’e esplika katak daudaun ne’e empreza tau ona mákina no eskavadora iha lokál obra atu halo konstrusaun, maibé seidauk hetan vistu husi Tribunál Konta maka kompañia labele halo projetu tanba laiha baze legál hodi apoia sira. Maski nune’e, empreza Marania Lda., asina ona kontratu ho Governu, liuliu ho Ministériu Obra Publika (MOP).
Daudaun empreza hein despaxu husi Kámara Konta atu implementa projetu maski orsamentu atrazu, maibé verba ne’e tama iha tinan 2026 no hakarak ka lakohi tenke halo konstrusaun.
“Tanba komunidade barak kestiona katak estrada diresaun Seloi-Kraik to’o Tokoluli-Ermera lansa ona iha fulan hirak ba kotuk, maibé to’o ohin loron seidauk halo konstrusaun. Ida-ne’e mak ita hotu nia preokupasaun”, prezidente ne’e relata.
Aleinde ne’e, problema seluk maka kompañia tolu halo konstrusaun estrada iha Seloi-Kraik hale’u lagoa Seloi iha tinan 2019 to’o ohin loron maibé obra ne’e agora abandona. Joao Bosco salineta katak ida-ne’e tanba orsamentu ki’ik no projetu ne’e maihusi nasionál mak orienta empreza halo mak seidauk finaliza.
“Ho nune’e maka ita husu MOP, projetu ho orsamentu ki’ik tanba sá la fó ba autoridade aunisípiu maka jere, nune’e implementa projetu maka la’o lentu karik autoridade nia ekipa kontrola kompañia atu halo konstrusaun lalais”, nia sujere.
Iha tinan 2019, Governu kontrata kompañia Chaviq Unip., Lda., hodi konstrui estrada hale’u sítiu turístiku lagoa Seloi-Kraik ho distánsia kilómetru neen no empreza LNG konstrui kilómetru rua, maibé ladauk remata.
Iha 2021, empreza Beskusa Unip., Lda., halo ona levantamentu dadus husi Seloi-Kraik bá to’o aldeia Kokoa, postu administrativu Railaku, maibé to’o agora projetu ne’e seidauk implementa.
Nune’e Xefe Suku Seloi Malere, António dos Santoa, husu ba MOP atu hapara empreza tolu ne’ebé halo konstrusaun estrada hale’u lagoa Seloi-Kraik. “Iha tinan kotuk ami hasoru ona MOP Samuel Marçal, ha’u informa kona-ba kompañia tolu ne’ebé halo konstrusaun ne’e paradu, tanba ne’e maka ami husu atu hapara kompañia tolu ne’e fó fali ba seluk hodi kontinua obra hodi fasilita transporte hotu-hotu bele asesu bá-mai tula komunidade nia produtu ba faa’n iha merkadu”, nia dehan.
Jornalista: Osória Marques
Editora: Maria Auxiliadora
