DILI, 21 Marsu 2026 (TATOLI) – Asistente Adidu Traballu Timor-Leste iha Korea Súl, José Sebastião Coli Soares, informa katak seidauk iha konfirmasaun kona-ba traballadór timoroan ligadu ho ahi han fábrika automóvel iha Daejeon, ne’ebé halo ema barak mak sofre kanek.
José Soares hateten katak daudaun seidauk simu informasaun kona-ba prezensa traballadór timoroan iha lokál insidente ne’ebé akontese iha sesta-feira, pur volta tuku 13h17 loraik.
“Ha’u ’u simu ona informasaun kona-ba insidente ahi-han kompañia iha provínsia Daejeon. Ha’u halo kedas diseminasaun informasaun liuhusi pájina facebook Gabinete Adidu Traballu hodi husu karik iha sidadaun Timor-Leste ne’ebé serbisu iha fatin referidu, maibé seidauk iha dadus ka konfirmasaun kona-ba prezensa timoroan iha kompañia ne’e. Autoridade sira sei kontinua halo monitorizasaun no buka tuir informasaun relevante atu asegura klaridade kona-ba situasaun ne’e”, asistente adidu hateten ba Tatoli via WhatsApp, ohin.
Nia relata katak empreza ne’ebé hetan insidente ahi-han mak ida-ne’ebé prodús válvula motór ba karreta no naviu. Empreza ne’e iha traballadór hamutuk 350-resin, maibé ema besik 200 mak iha fábrika laran iha tempu akontesimentu.
“National Fire Agency fó orden mobilizasaun Bombeiru iha oras 13h53 lokraik, tanba preokupasaun kona-ba posibilidade vítima barak. Komisáriu Ajénsia, Kim Seung-ryong, fó instrusaun atu mobiliza rekursu bombeiru hotu-hotu ne’ebé disponivel atu hamenus númeru vítima, no orienta autoridade sira atu fó prioridade ba operasaun salvamentu no seguransa bombeiru sira”, nia esplika.
Nia dehan unidade bombeiru no salvamentu husi South Chungcheong, North Chungcheong no Sejong mós despaixa bá fatin akontesimentu. Aleinde ne’e mós utiliza robot bombeiru rua ne’ebé laiha operadór no sistema espuma kapasidade aas atu ajuda kontrola ahi. Ajénsia ne’e ativa ekipa resposta emerjénsia no mós haruka ofisiál situasaun ida bá fatin akontesimentu.
Tuir notísia husi AP ne’ebé Tatoli asesu, ekipa salvamentu hetan ona ema na’in-10 mak mate. Inséndiu ne’ebé kauza husi esplozaun ne’e halo ema na’in-59 sofre kanek no na’in-haat sei lakon.
Ministériu Interiór no Seguransa hateten katak ema na’in-25 sofre kanek grave, maibé autoridade seidauk konfirma karik iha vítima ruma iha kondisaun ameasa ba moris.
Jornalista: Osória Marques
Editoa: Maria Auxiliadora
