BTL husu komunidade kuidadu rekursu bee atu uza ba moris loro-loron
DILI, 23 Marsu 2026 (TATOLI)—Bee Timor-Leste, Empreza Públiku (BTL, E.P), segunda ne’e, selebra loron mundiál bee no jenéneru ho tema “Bee seguru iha kustu: Kompartilla responsabilidade hodi hamenus bee lakon no proteje kualidade bee”.
Prezidente Bee Timor-Leste, Gustavo da Cruz, hateten bee no jenéneru ne’e maiória utilizasaun ne’e husi inan-feton sira no konsidera mós bee hanesan direitu umanu, no husu komunidade bele kuidadu rekursu bee ne’ebé iha atu uza ba moris loro-loron tanba bee ne’e importante tebes ba ema-nia moris.
“Liuliu lideransa komunitária sira-ne’ebé sempre simu preokupasaun husi komunidade kona-ba bee-moos, nune’e iha biban ne’e ita bele fahe informasaun ba malu. BTL hamriik tinan lima ona no esforsu nafatin oinsá mellora bee-moos ba komunidade,” Prezidente informa ba jornalista sira iha salaun apuramentu CNE, Kolmera ohin.
Formesimentu bee husi kanalizasaun públiku ne’ebé BTL jere foin atinje 48%, kobertura enjerál atinje 98%, signifika katak komunidade asesu bee moos husi fonte oioin hanesan bee posu, bee matan, nune’e sei iha servisu lubuk ida-ne’ebé sira presiza mellora ka hasa’e kobertura kanalizasaun atu atinje to’o 50%.
“Tanba ne’e husu ba komunidade atu servisu hamutuk ho BTL hodi garante fornesimentu bee-moos ho di’ak, katak labele liga ilegál ba kanalizasaun bee no labele destroi kanalizasaun bee ne’ebé Governu estabelese ona,” nia apela.
Iha biban ne’e, Prezidente Autoridade Munisípiu Dili, Francisco dos Santos, hateten bee mak fó moris ba ema, tanba ne’e mundu tomak selebra loron bee nian maske bee mós iha problema id- ne’ebé mak kompleksu tebe-tebes, tanba asesibilidade ba komunidade ladun másimu.
“Tanba ne’e husu ba BTL atu kontinua esforsu hodi fó asisténsia másimu ba asesibilidade bee ba komunidade ne’ebé to’o agora seidauk asesu ba bee-moos. Maibé komunidade mós tenke iha konsiénsia atu labele estraga kanalizadaun públiku no dada bee illegal,” nia dehan.
Aleinde ne’e, autoridade lokál sira reafirma kataksira prontu servisu hamutuk ho BTL atu garante fornesimentu bee-moos ba komunidade no kuidadu fasilidade Estadu nian ho di’ak, tanba ida-ne’e hanesan servisu integradu, la’ós de’it BTL mak atu tau matan maibé oinsá ema hotu hamutuk asegura kanalizasaun sira ho di’ak no bele fó benefísiu ba ema hotu.
Entretantu atividade selebrasaun loron mundiál bee no jéneru ne’e marka prezensa husi entidade oioin hanesan Governu, autoridade lokál, estudante universitáriu inklui parseiru dezenvolvimentu no durante atividade sei iha espozisaun ki’ikoan kona-ba abastesimentu bee-moos.
Jornalista : Alexandra da Costa
Editór : Cancio Ximenes
