KI fasilita formasaun jornalizmu ambientál ba jornalista sira iha Kovalima
KOVALIMA, 23 Marsu 2026 (TATOLI)-Konsellu Imprensa (CI-sigla portugués), segunda ne’e, fasilita formasaun jornalizmu ambientál ba jornalista sira kompostu husi Ajénsia TATOLI, Hatutan, Dili Post, Lafaek News, Mídia Mudansa, Oan Timor, RCCT Kovalima, DFM, RCC Komoro no GMN durante loron rua hahú loron 23 to’o 24 fulan-marsu 2026.
Diretór Diresaun Analiza no Dezenvolvimentu Mìdia Konsellu Imprensa, Alberico da Costa Junior hateten, formasaun ne’e hanesan programa kontinuasaun Konsellu Imprensa nian ne’ebé tau ona iha planu orsamentu tinan-tinan.
“Molok ne’e mós atividade jornalizmu ambientàl ami hala’o iha munisípiu Likisa ne’ebé nia fundu mai husi UNDP formadór mai husi Indonézia espera Jornalista ambientàl. Iha tinan kotuk ami hala’o iha Lautén tanba liga ho sítiu turístiku, iha 2026 ne’e ita hala’o iha Kovalima razaun futuru projetu Suai Supply Base,” Alberico da Costa Juniór hateten ba jornalista sira Otél Vida Nova.
Nia hatutan bainhira projetu Suai supply Base ne’e maka realiza iha futuru sei fó impaktu ba kestaun ambientál, sosiál no ekonómia. Tanba ne’e maka sai base ba Konsellu Imprensa hodi fasilita formasaun ba jornalista sira atu iha koñesimentu di’ak liután hodi halo kobertura iha área referidu.
“Realidade hatudu katak iha tinan hirak liu ba prosesu halo perfurasaun mina iha Kovalima hodi hamosu impaktu Sosiál, kulturál ba komunidade sira sai hanesan baze ba KI atu fasilta formasaun ambientàl iha Kovalima,” tenik tan.
Diretór ne’e dehan, jornalista ambientál ninia koñesimentu kobertura persiza iha metódu espesifiku liliu kona-ba impaktu ambientál, kauza no solusaun.
Iha fatin hanesan Oradór atuál Prezidente Autoridade Munisípiu Kovalima, Miguel Armanda Cardoso, aprezenta ba jornalista sira kona-ba futuru instalasaun projetu Suai Supply Base iha Kovalima
“Ha’u mai iha ne’e atu partilla informasaun futuru projetu Suai supply Base iha Kovalima hanesan fatin lojistika hodi prepara produsaun iha bayundang no greater sunrise”nia dehan.
Jornalista:Celestina Teles
Editór: Florencio Miranda Ximenes
