VIKEKE, 23 Marsu 2026 (TATOLI)—Xefe Suku Makadike de Baixo, Postu Administrativu Uatulari, Munisípiu Vikeke, Rogério da Silva, hateten autoridade no populasaun Suku Makadike de Baixo inisiativa konstrui sede suku ho medida metru 11×20.
“Ami suku foun ne’ebé seidauk iha sede suku, entaun ami ho inisiativa ida fó ami-nia kontribuisaun rasik ba konstrusaun sede suku. Konstrusaun sede suku ami hada ona nia aliserse, ateru mak seidauk,” Rogério ba TATOLI iha resintu Munisípiu Vikeke, Segunda ne’e.
Nia dehan sira hakarak aselera para iha selebrasaun 20 Maiu iha Postu Uatulari konstrusaun bele prontu ona.
Rogério esplika kada uma-kain iha Suku Makadike de Baixo kontribui osan $5 to’o $15 hodi konstrui sede suku referidu.
Entretantu, konstrusaun sede Suku Makadike de Baixo konstrui iha área Asamatadu, sei benifísia populasaun aldeia hitu ho totál populasaun hamutuk na’in-650 no uma-kain 400.
Jornalista: Vitorino Lopes da Costa
Editór: Xisto Freitas da Piedade
