BAUKAU, 23 Marsu 2026 (TATOLI)—Médiku no enfermeiru hamutuk na’in-20, Segunda ne’e, partisipa treinamentu kona-ba atendimentu pasiente iha área Kuidadu Saúde Urjente iha Ospitál Rejionál Eduardo Ximenes (HoREX-sigla portugeza) Baukau.
Diretór Ezekutivu HoREX Baukau, Claudino Ximenes, esplika treinamentu referidu nu’udár parte atubele eleva koñesimentu husi médiku no enfermeiru liuliu maneira atende pasiente sira iha sala Intensive Care Unit (ICU) ne’ebé antes ne’e estabelese ona iha HoREX durante tinan-tolu.
“Sira iha-ne’e hakle’an sira-nia koñesimentu depoiz kontinuasaun fahe ba malu ba kada pesoál saúde sira iha Ospitál idaidak,” Claudino Ximenes hateten iha ninia kna’ar fatin, Vila Nova, Segunda ne’e.
Treinadór infremeiru husi National Critical Care and Trauma Response Centre (NCCTRC), Beth Price hateten treinamentu refere realiza ho objetivu atu reforsa koñesimentu iha área atendimentu pasiente ligadu ho kazu emerjénsia hodi redús númeru kazu emerjénsia iha kada ospitál.
“Treinamentu foku ba kuidadu krítiku nian. Signifika, kazu ne’ebé mai ho emerjénsia ne’e oinsá mak ne’e halo atendimentu,” Beth Price esplika.
Entretantu, treinamentu referida hala’o husi Sentru Nasional Kuidadu Kritiku no Resposta ba Trauma (NCCTRC-sigla ingleza) no Institutu Saúde Públika Timor-Leste (INSPTL) ho totál partisipante hamutuk na’in-20 ne’ebé maihusi ospitál rejionál, referrál no nasionál ne’ebé realiza durante loron-tolu, husi 23-25 Marsu tinan ne’e.
Jornalista: Natalino Belo
Editór: Xisto Freitas da Piedade
