DILI, 23 Marsu 2026 (TATOLI)—Diretór Operasaun Manutensaun BTL, Aleixo dos Santos, hateten durante ne’e servisu melloramentu bee-moos ba komunidade seidauk másimu tanba impaktu mós husi kustu, tanba ne’e presiza kustu ne’ebé boot hodi fasilita servisu fornesimentu bee-moos to’o komunidade.
“Nune’e, Governu tenke aloka orsamentu ne’ebé apropriadu hodi apoiu servisu BTL nian ho di’ak iha terrenu, tanba bainhira ita atu mellora fornesimentu bee-moos ba komunidade tenke iha fasilidade ne’ebé modernu no adekuadu,” Diretór ne’e informa ba jornalista sira iha salaun apuramentu CNE, Kolmera, ohin.
Nia dehan, sistema formesimentu bee husi kanalizasaun públiku ne’ebé BTL jere foin atinje 48%, kobertura enjerál atinje 98%, signifika katak komunidade sira asesu bee-moos husi fonte oioin hanesan bee posu, bee matan, nune’e sei iha servisu lubuk ida-ne’ebé sira presiza mellora ka hasa’e kobertura kanalizasaun atu atinje to’o 50%.
“Tanba ita iha dikuldade barak la’ós de’it kustu maibé mós fasilidade, entaun ita presiza fasilidade ne’ebé mak kualidade liuliu ekipamentu hirak ne’e lafaan iha Dili, ne’e faan iha rai-li’ur,” nia dehan.
Kona-ba melloramentu fornesimentu bee-moos ba kapitál munisípiu sira, nia dehan, foin implementa iha Lospalos no Same, enkuantu iha Dili, Baukau Vikike, faze elaborasaun hotu ona no iha munisípiu neen mak daudaun ne’e iha hela faze elaborasaun.
Tanba ne’e, nia dehan, maske Governu seidauk iha kustu ne’ebé apropriadu, maibé servisu ida-ne’e tenke kompartilla hamutuk ho entidade hotu-hotu atu tau matan hodi rezolve problema sosiál ida-ne’e no bele atinje meta ho di’ak, tuir Planu Estratéziku Dezenvolvimentu Nasionál 2011-2030.
Jornalista : Alexandra da Costa
Editór : Cancio Ximenes
