DILI, 23 Marsu 2026 (TATOLI)—Vise- Ministru Fortalesimentu Instituisionál Saúde, José dos Reis, hateten Ministériu Saúde seidauk koloka profisionál saúde hamutuk 200-resin ba munisípiu sira tanba sei apoiu kazu dengue ne’ebé daudaun ne’e afeta iha munisípiu Dili.
“Loloos ita-nia profisionál saúde ne’ebé konkorre ona vaga ne’e ita atu haruka ona ba munisipiu sira maibé konsentra hela iha Dili, atu bele apoiu tan médiku sira seluk. Entaun, ba oin, ita atu muda ba munisípiu, maibé ita haree lai situasaun kazu dengue, maibé tinan ne’e iha sei haree tan rekursu naton atu bele apoiu tan sira,” ose Magno hateten ba jornalista sira, ohin.
Nia dehan, profisionál saúde sira-ne’ebé mak foin liu iha vaga ne’e sei konsentra iha Munisípiu Dili no balun iha Hospitál Nasionál Guido Valadares (HNGV).
“Sira iha Dili para apoia ospitál nasionál no mós Munisípiu Dili no mós sentru saúde saúde Vera Krúz, Bekora, Formosa no Komoro. Agora, iha ne’e la’ós de’it apoiu maibé sira hanesan introdusaun tanba sira-ne’e foun. Saúde progama hotu ba sira atu ba karik sira pelumenus sira bele hateten ona servisu, ita halo rekrutamentu maibé sira seidauk iha koñesimentu kle’an kona-ba programa saúde sira,” nia dehan.
Tanba ne’e, husu Sentru Saúde Internamentu Vera Krúz atu kontinua halo limpeza iha areadór iha ospitál no mós sala sira-ne’e, atu nune’e pasiente mai karik sente ho seguru.
Iha Sorin seluk, Xefe Sentru Saúde Internamentu Vera Kruz, Marilia da Conceição Ferreira, informa Sentru Saúde Internamentu Vera Kruz hetan duni pesoál saúde ne’ebé mak koloka mai iha ne’e maibé nafatin presiza atu bele reforsa servisu ne’ebé mak iha.
“Sim ami hetan koloka médiku ida (1), infermeiru na’in-rua (2), klaru ke ita presiza rekursu umanu atu haforsa servisu ne’ebé mak iha,” Xefe Sentru Saúde Internamentu Vera Kruz ne’e hateten.
Jornalista : Felicidade Ximenes
Editór : Cancio Ximenes
