DILI, 23 Marsu 2026 (TATOLI)-Parlamentu Nasionál aprova proposta rezolusaun númeru 51/VI(3a) hodi ratifika adezaun Repúblika Demokrátika Timor-Leste ba Tratadu Estradisaun Asosiasaun Nasaun Sudeste Aziátiku (ASEAN, sigla inglés).
Ministru Negósiu Estranjeiru no Kooperasaun (MNEK), Bendito Freitas, dehan tratadu ne’e asina iha 14 Novembru 2025 iha Manila, Filipina, hosi Ministru Justisa, Sérgio Hornai, durante reuniaun da-XIII Ministru Justisa ASEAN. Asinatura ne’e reprezenta partisipasaun dahuluk Timor-Leste nu’udar membru plenu organizasaun ASEAN nian.
“Tratadu ne’e estabelese kuadru jurídiku ida unifikadu ba prosesu estradisaun entre Estadu membru ASEAN nian atu reforsa kooperasaun rejionál no kombate ba kriminalidade tranznasionál, inklui krime sibernétika, tráfiku umanu, brankeamentu kapitál no infrasaun sira seluk”, nia hateten.
Aleinde ne’e, define prinsípiu, prosedimentu krime abranjidu, motivu rekuza, obritagóriu diskrisionáriu no garantia prosesuál no umanitária.
Lembra katak, iha 20 Fevereiru 2026, Primeiru-Ministru, Xanana Gusmão, aprezenta iha Konsellu Ministru proposta rezolusaun Parlamentu Nasionál ne’e atu ratifika tratadu referidu.
“Governu apoia ratifikasaun ho pareser favoravel ne’ebé fundamenta jurídiku prinsipál aliña ho kompromisu ba adezaun ASEAN, fortalesimentu kooperasaun jurídiku rejionál no kombate krime transfronteira no nesesidade atu armoniza ordenamentu jurídiku interna, nu’udar instrumentu kooperasaun rejionál”, Bendito Freitas dehan.
Tuir nia, tratadu ne’e mós iha benefísiu ba seguransa, rule of law, no integrasaun plena país nian iha ASEAN. “Hafoin ratifikasaun husi Parlamentu, depozita instrumentu ratifikasaun hamutuk ho Sekretáriu-Jerál ASEAN, tratadu entra ein vigór ba Timor-Leste. Pasu ne’e konsolida integrasaun Timor-Leste iha arkitetura jurídika ASEAN, kontribui boot ba reziliénsia rejionál kontra krime organizadu”, nia salienta.
Jornalista: Nelson de Sousa
Editora: Maria Auxiliadora
