DILI, 23 Marsu 2026 (TATOLI)—Ekipa futeból femininu S’amuser Football Club (FC) sai kampiaun ba kompetisaun primeira divizaun Liga Futeból Femininu Timor-Leste (LFFTL) époka 2025-2026.
S’amuser sussesu gaña títulu kampiaun hafoin impata 0-0 ho AD SLB iha jogu ikus jornada 18 ne’ebé hala’o iha Kampu Federasaun Futeból Timor-Leste (FFTL), Bairros dos Grilos, Domingu (22/02/2026).
Elementu Julião dos Reis Mendonça ne’e kumpri promesa sai kampiaun ho jogu ne’ebé disiplina iha área defensiva, iha-ne’ebé durante jogu sussesu salva ameasa husi ekipa Laulara.
Notísia relevante: S’amuser FC lidera tabela klasifikasaun primeiru divizaun LFFTL
Ho rezultadu jogu entre ekipa rua, rezulta S’amuser FC konsege aumenta pontu ida (1) hodi determina hiit taxa inklui bonus orsamentu hamutuk rihun $15, iha-ne’ebé rezulta diferente pontu tolu ho AD SLB iha tabele ikus klasifikasaun primeira divizaun.
S’amuser FC rasik durante hala’o jogu 18 rekolla totál pontu 45, rezultadu manán 14, impata tolu (3), derrota ida (1) no produtividade golu (+/-) 88, enkuantu AD SLB manán 13, impata 3, derrota ida (1) ho totál pontu 42 no produtividade golu (+/-) 137.
Entretantu, primeira divizaun LFFTL partisipa husi klube sanulu (10) kompostu husi klube ualu mak mantein iha kompetisaun primeira divizaun hanesan S’AMUSER FC, AD SLB LAULARA, BUIBERE FC, MAUDOKO FC, MARANATHA FC, AKADÉMICA FC, NA’IN-FETO FC, UNITAL FC, enkuantu klube rua obrigadu tenke dezpromovida ka tun ba segunda divizaun hanesan VDL FC no KULUGUISA FC.
Jornalista: Natalino Belo
Editór: Xisto Freitas da Piedade
