Tempu besik FNB-TL realiza formasaun ba treinadór no árbitru sira
DILI, 23 Marsu 2026 (TATOLI)–Prezidente Federasaun Basketból Timor-Leste (FNB-TL), Joaquim José Gusmão dos Reis Martins, hateten tempu besik sei loke formasaun ba treinadór no árbitru sira hodi aumenta rekursu iha federasaun.
“Ita sei loke formasaun ba treinadór sira atu nune’e bele iha sertifikadu antes lidera klube ida. Ita iha treinadór maibé sei mínimu tebes, nune’e mós iha árbitru maibé sei menus entaun ita sei loke formasaun antes liga hahú sira bele iha ona sertifikadu,” Joaquim hateten ba jornalista sira iha Jináziu, segunda ne’e.
Nia dehan, formasaun ne’e formadór mai husi Indonézia ba sira-ne’ebé iha ona sertifikadu báziku ba treinadór no árbitru. Ba hirak ne’ebé seidauk iha sertifikadu báziku FNBTL mak sei fó formasaun.
“Ita tenke loke formasaun ne’e importante, atu nune’e ita bele hetan tan treinadór no árbitru foun. Iha oportunidade ne’e ami hakarak konvida timoroan sira-ne’ebé hakarak sai treinadór no árbitru ba basketból bele hakbesik-aan mai edifisiu FNBTL. Formadór sira sei mai husi Indonézia, entaun jogadór basketból sira-ne’ebé idade boot ona labele joga ona bele mai rezista atu tuir formasaun ba treonadór no árbitru,” nia dehan.
Nia subliña, treinadór no árbitru iha FNBTL sei menus, ho nune’e presiza tan treinadór no árbitru atu ajuda liga ne’e la’o ba oin ho susesu no buka fini ba atleta sira hodi prepara ba jogu internasionál no rejionál.
Jornalista : Hortencio Sanchez
Editór : Cancio Ximenes
