DILI, 24 Marsu 2026 (TATOLI)—Embaixadór Korea ba Timor-Leste, Chang Hayeong, hala’o ekontru ho Primeiru-Ministru, Kay Rala Xanana Gusmão, hodi introdús nia an hafoin simu kna’ar hodi hala’o misaun diplomata iha Timor-Leste.
Embaixadór Korea iha Timor-Leste, Chang Hayeong, kompromete atu hametin liután relasaun bilaterál entre Korea mo Timor-Leste.
“Durante ami nia enkontru xefe Governu Timor-Leste, hato’o oinsá relasaun entre Governu Korea ho Timor-Leste durante ne’e. Durante ha’u-nia mandatu tinan tolu iha ne’e, ha’u sei servisu maka’as hodi hametin liután relasaun bilaterál entre nasaun rua ne’e,” Embaixadór Korea ne’e informa ba jornalista sira iha Palásiu Governu, ohin.
Nia haktuir, mensajen husi Primeiru-Ministru, Kay Rala Xanana Gusmão, sei hasoru malu nafatin durante tinan tolu nia laran no oinsá Governu Korea nia apoiu ba parte ida-ne’ebé mak Governu Timor-Leste presiza.
“Ha’u seidauk bele relata kona-ba área ne’ebé Governu Korea prefere atu apoia, tanba ida-ne’e foin hasoru malu dahuluk entre ha’u ho PM. Asuntu detallu liu, ami seidauk iha diskusaun maibé sei diskute iha tempu tuir mai tanba ha’u-nia mandatu iha ne’e sei kle’ur,” nia hateten.
Antigu Sekretáriu Ezekutivu CPLP, Zacarias Albano, enkontru ho PM
Entretantu, iha biban ne’e mós, Antigu Sekretáriu Ezekutivu CPLP, Zacarias Albano da Costa, hateten ida-ne’e hanesan enkontru ida ho Primeiru-Ministru, ne’ebé la’ós enkontru ofisiál ne’ebé ko’alia kona-ba sistuasaun sosiál maibé atu troka opiniaun kona-ba situasaun agora iha área polítika, ekonomia, esterna no interna, ASEAN no asuntu CPLP
“imi hatene katak ha’u-nia envolvimentu iha rai ida-ne’e ba apoiu polítika no diplomásia ne’ebé sempre forte. Maibé, agora ha’u mós sei deskansa hela hafoin asume kna’ar Sekretáriu Ezekutivu CPLP durante tinan haat. Ha’u agora hanesan ema sivíl laiha kargu ida, maibé ha’u kontinua nafatin haree no rona bainhira Governu presiza entaun ha’u sempre bá,” nia dehan.
Nia dehan, hafoin termina ninia mandate, tuir nia observasaun iha diferensa entre nia mandatu ho agora tanba antes ne’e Timor-Leste nunka problema ho nasaun membru CPLP sira seluk (Guiné-Bissau), maibé onra boot ida ba Timor-Leste bele sai prezidénsia ba CPLP entaun diferensa barak ne’e mak agora Timor-Leste mós bele lidera, entaun tenke esforsu servisu maka’as hodi rezolve problema iha CPLP.
“Tanba ne’e, husi enkontru ne’e Primeiru-Ministru fó mensajen mai ha’u hanesan baibain tanba daudaun ne’e ha’u hanesan ema sivíl,” nia hateten.
Jornalista : Alexandra da Costa
Editór : Cancio Ximenes
