Governu prevee $500.000 ba LFTL realiza liga futeból 2026
DILI, 24 Marsu 2026 (TATOLI) – Diretór Nasionál ba Desportu Federadu Ministériu Juventude Desportu Arte no Kultura (MJDAK), Oscar Dias Quintas, hateten iha tinan ne’e Governu prevee ona orsamentu hamutuk $500.000 ba LFTL atu realiza liga Liga Futeból Timor-Leste 2026 iha Timor-Leste.
“Iha tinan 2026, ami prevee orsamentu ba Liga Futeból Timor-Leste purvolta de $500.000, ne’ebé liga tinan ne’e ita apoiu nafatin,” Oscar hateten ba Agência TATOLI iha edifisiu MJDAK Lecidere, ohin.
Nia dehan, LFTL bele halo ona preparasaun atu nune’e iha tempu besik Governu transfere orsamentu bele halo ona abertura ba liga 2026.
“Agora sira bele halo ona preparasaun sira. Ita haree ona sira-nia proposta mai Governu ne’e, ami-nia ekipa haree hela semana ne’e halo ona pareser ba ministru oinsá bele foti desizaun ba sira-nia proposta ne’e,” nia dehan.
Tanba ne’e, nia husu ba LFTL bele halo abertura ba liga 2026 iha fulan-Abíl ka tarde liu realiza iha Fulan-Maiu tinan 2026 ne’e.
“Sé buat hotu loos ona, ita halo transferensia uluk 50% ba liga. Bainhira sira halo relatóriu hotu ona mak ita transfere fali 50% ba. Ida-ne’e prosesu normál ne’ebé ita halo,” nia dehan.
Antes ne’e, agência TATOLI halo ona entrevista ho Prezidente LFTL Ipolito Soares hateten katak, liga sei halo abertura iha fulan-Abríl no sira-nia parte hasoru malu ona ho Governu hodi ko’alia kona-ba oinsá Governu nia apoiu ba liga époka 2026.
Jornalista : Hortencio Sanchez
Editór : Cancio Ximenes
