IGEADE.I.P normaliza estrada iha Tilomar
KOVALIMA, 23 Marsu 2026 (TATOLI)-Autoridade Munisípiu Kovalima servisu hamutuk ho Institutu Jestaun Ekipamentu no Apoiu Dezenvolvimentu Infraestrutura, Insitutu Públiku (IGEADE.I.P), normaliza ona estrada husi diresaun postu administrativu Tilomar, suku Beiseuk, aldeia Maubesi ne’ebé liga bá postu administrativu Fatumea Kovalima.
“Estrada husi Tilomar bá Fatumea ita normaliza ona tanba rai halai taka estrada hodi difikulta movimentu transporte públiku no privadu,”Prezidente Autoridade Kovalima , Miguel Armada Cardoso, hateten ba jornalista iha Kovalima segunda ne’e.
Nia esplika IGEADE normaliza estrada kuaze metru 20 iha fatin ne’ebá hafoin Autoridade Munisipál Kovalima submete pedidu ne’e ba instituisaun Estadu ne’e tanba konsidera urjente atu fasilita movimentu transporte públiku.
Iha pedidu ne’e, Autoridade Munisipál Kovalima husu mós ba IGEADE.I.P atu halo mós normalizasaun estrada husi postu administrativu Zumalai bá munisipiu Bobonaru ne’ebé daudaun ne’e kondisaun grave tanba impaktu husi dezastre naturál rai halai hodi taka estrada públiku referidu.
Iha parte seluk, Agapito de Jesus nu’udar komunidade iha fatin ne’ebá relata katak estrada ne’e la’os foin mak aat maibé rai monu bebeik ona hodi afeta ba movimentu transporte públiku motor no karreta.
“Estrada ne’e kle’ur ona molok tama tinan foun estrada ne’e monu halo normalizasaun ne’e bele fasilita ami halo movimentum,” nia dehan.
Jornalista:Celestina Teles
Editór: Florencio Miranda Ximenes
