KEIFP-PM diskute estratéjia atu másimiza investimentu fundu petrolíferu
DILI, 24 Marsu 2026 (TATOLI)—Konsellu Ezekutivu Investimentu Fundu Petrolíferu, tersa ne’e, hasoru malu ho Primeiru-Ministru, Kay Rala Xanana Gusmão, hodi diskute kona-ba ezekusaun no estratéjia atu másimiza investimentu fundu petrolíferu, aleinde ne’e fó konesimentu membru Board ba Xefe Governu.
Membru Board no atuál Prezidente Autoridade Nasionál Petróleu, Gualdino do Carmo da Silva, hateten ohin loron asesória investimentu fundu petróleu nian ne’ebé mak mai hasoru malu ho Primeiru-Ministru hodi diskute kona-ba fundu petróleu no despeza ne’ebé durante ne’e halo husi fundu petróleu, tanba baibain kada tinan sira sempre halo semináriu ba ekipa tékniku husi Banku Sentrál Timor-Leste no Ministériu Finansa.
“Preparasaun husi semana ida iha ne’e halo hela workshop durante loron tolu ne’ebé tinan ida sempre realiza workshop dala rua hodi halo avaliasaun ba andamentu investimentu fundu petróleu nian tanba sira durante ne’e servisu besik liu ho MF no BCTL. Uza oportunidade ida-ne’e ho disponibilidade husi Primeiru-Ministru no Ministra Finansa nia akompañamentu tanba membru Board sei mai halo enkontru ho Xefe Governu,” Prezidente ANP ne’e informa ba jornalista sira iha Palásiu Governu, ohin.
Nia dehan, ida-ne’e enkontru de’it tanba tuir lei Board ida-ne’e sei relata de’it ba Ministra Finansa ne’ebé hanesan ezekutivu no reprezentante Governu ne’ebé mak haree portofóliu kona-ba finansa inklui investimentu fundu petróliferu.
“Nune’e, husi tempu ba tempu, bainhira board ida-ne’e halo ninia servisu no sempre hato’o ninia pareser ba Governu liuhusi Ministériu Finansa, hafoin hato’o fali ba Konsellu Ministru,” nia dehan.
Signifika ohin ne’e lori de’it bainaka membru Board nia ba aprezenta Primeiru-Ministru, enkuantu kona-ba funu iha médiu oriente ne’e Governu mak bele relata, tanba asuntu ida-ne’e halai liu ona ba ezekusaun no estratéjia atu másimiza investimentu fundu petróliferu
“Atu másimiza investimentu fundu petróliferu tenke iha servisu barak liuhusi meiu koordenasaun institusionál no parséria. Maske ita uza reseita husi fundu petróliferu, maibé tinan kotuk paradu tiha, entaun sira nafatin esforsu buka solusaun hodi kontinua fó valór ba fundu petróliferu,” nia dehan.
Jornalista : Alexandra da Costa
Editór : Cancio Ximenes
