DILI, 24 Marsu 2026 (TATOLI)-Komisaun A ne’ebé trata Asuntu Konstitusionál no Justisa submete ona alterasaun Lei Eleitorál ba Parlamentu Nasionál no Lei Eleitorál Munisipál ba meza Parlamentu.
Prezidente Komisaun A, Natalino dos Santos, hateten projetu lei ne’e subskreve husi deputadu sira iha Komisaun ho objetivu atu altera artigu balun iha lei vijente hodi halo ajustamentu ba lei rua ne’e, liuliu atu haree ba realizasaun eleisaun podér lokál ne’ebé sei realiza iha tinan oin.
Deputadu ne’e seidauk esplika detalla matéria alterasaun ne’e, tanba sei halo uluk apresiasaun inisiál.
Liuhusi reuniaun plenária Parlamentu, ohin, meza anunsia no baixa ona projetu lei númeru 16/VI/(3a)-alterasaun dahaat Lei númeru 5/2006, loron 28 Dezembru, Órgaun Administrasaun Eleitorál, alterasaun dalimak lei númeru 6/2006, loron 28 Dezembru, Lei Eleitorál ba Parlamentu Nasionál no alterasaun dahuluk lei númeru 22/2021, loron 04 Novembru, Lei Eleitorál Munisipál ba Komisaun A hodi halo apresiasaun inisiál.
Nune’e, komisaun sei marka audiénsia públika hodi fó ninia relatóriu no pareser, diskusaun jeneralidade, espesialidade no finál globál.
Lembra katak Lei Eleitorál mak regula eleisaun deputadu ba Parlamentu Nasionál no Lei Eleitorál Munisipál regula eleisaun Prezidente Munisípiu, Vise-Prezidente Munisípiu no deputadu asembleia munisipál.
Jornalista: Nelson de Sousa
Editora: Maria Auxiliadora
