KOVALIMA, 24 Marsu 2026 (TATOLI)-Ekipa World Vision munisípiu Kovalima, hamutuk ho Autoridade Munisipál, tersa ne’e, selebra loron internasionál feto ne’ebé maka monu iha loron 8 fulan-marsu tinan ne’e, “ tanba ne’e, husu ba feto no labarik feto sira atu hadook aan husi risku violénsia.
Selebrasaun loron Internasionál feto iha Kovalima ho tema “Ema hotu iha diretu hanesan hodi asesu ba justisa proteje feto no labarik feto sira,hamutuk ita hametin igualdade jéneru”.
Sekretáriu Munisipál Asuntu Sosiál no Komunitária, Filomeno Cardoso, hateten atu hadook aan husi risku violénsia dalan ida maka evita ho kaben sedu, asesu pornografia, ransu livre no seluk tan.
“Ohin loron ita-boot sira-nia hakarak fanun ita-boot sira hotu,oinsá ita bele proteje ita-nia inan feton sira no ita-nia oan feto sira husi risku ba violénsia doméstika iha mundu tomak,” nia hateten iha ninia diskursu iha salaun Parokiál Zumalai, ohin.
Nia dehan tema ne’e importante atu kapasita nafatin feto sira, envolve feto sira iha eventu sira no foti desizaun nune’e bele hametin igualdade jéneru.
“Ho nune’e Autoridade Kovalima apela nafatin hakarak asegura feto sira oinsá bele promove no empodera sira bele avansa ba oin hanesan ho mane sira,”tenik tan.
Iha sorin seluk Jerente Interinu World Vision Munisípiu Kovalima, Aureo Moniz Cardoso hateten, Komemorasaun loron Internasionál feto ho tema ne’e importante atu fó valór ba feto no mós promove igualdade jéneru iha Kovalima.
“Ita hotu nia maluk feto iha papel iha nível foti desizaun, empoderamentu no responsablidade iha uma laran tanba World Vision nia misaun atu gatante no asegura oinsá mak labarik sira asesu edukasaun saudavél livre husi kualker tipu violénsia hodi asesu ba bem estar,” nia reforsa.
Entertantu, serimónia selebrasaun loron internasionál ne’e ne’ebé organiza husi World Vision munisípiu Kovalima ne’e hodi konvida oradór husi Sekretáriu Estadu Igualdade (SEI), hodi partilla informasaun kona-ba violénsia baseia ba jéneru, PNTL sesaun VPU Kovalima partilla informasaun kona-bá papél VPU atende kazu violénsia doméstika, abuzu seksuál, violénsia adolesente, tráfiku umanu no kazu abandona.
Jornalista:Celestina Teles
Editór: Florencio Miranda Ximenes
