Palásiu Prezidensiál-MJDAK halo preparativu ba eventu Dili Internasionál Maratona 2026
DILI, 24 Marsu 2026 (TATOLI)–Palásiu Prezidensiál liuhusi Xefe Kaza Sivíl, Henriqueta Maria, akompaña husi Adjunta Xefe Kaza Sivíl, Graziela Fátima, tersa ne’e, iha edifisiu Ministériu Juventude, Desportu, Arte no Kultura (MJDAK) hasoru malu ho Ministru Nelyo Isaac Sarmento hodi ko’alia kona-ba preparativu ba eventu Dili Internasionál Maratona 2026 ne’ebé sei realiza iha fulan-Agostu mai ne’e.
“Dili Internasionál Maratona ne’e inisiativa Prezidente Repúblika nian, ba tinan ida-ne’e nian mak ami mai hala’o enkontru koordenasaun ida ho MJDAK atu ita servisu hamutuk. Tanba sira mak Ministériu ida-ne’ebé ezekutivamente, ezekuta programa sira kona-ba desportu nian, reuniaun ne’e iha sinál pozitivu tanba sira prontu apoiu tékniku ba eventu ne’e,” Henriqueta hateten.
Nia dehan, hasoru malu ne’e atu ko’alia mós kona-ba Prezidente Repúblika nia hanoin oinsa atu institusionaliza programa Dili Internasionál Maratona ba sistema Governu nian.
“Programa ida-ne’e iha tinan ne’e ita sei halo boot, tanba ita-nia meta atu akomula ema liu 7.000 mak partisipa. Ba internasionál, ita loke oportunidade ba ema na’in-500, seluk ne’e timoroan sira-ne’ebé iha vontade hakarak kurida bele partisipa. Prémiu ba manán na’in sira-ne’e internasionál ho nasionál hanesan, primeiru lugar $4000, sertifikadu no medalla,” nia esplika.
Tema prinsipál ba Dili Internasionál Maratona 2026 “Mai ita halai hodi hadomi ita-nia ai-laran sira no animál fuik sira”. Tema ne’e, atu fó hanoin ba ema hotu atu konserva no proteze floresta no animál fuik sira.
Orsamentu ba eventu ne’e mai husi Palásiu Prezidensiál no Governu hamutuk millaun $5 resin.
Kalendáriu
Meiu maratona selesaun nasionál sei realiza iha loron 09 fulan-Maiu 2026 ho nia distánsia 21.1 Kilómetru.
Maratona Internasionál sei hala’o iha loron 08 fulan-Agostu, distánsia maratona kompletu 42.195 kilómetru, meiu maratona 21.1 kilómetru ba atleta kilómetru 10, halai divertidu ka Fun Run kilómetru lima (5).
Rute ne’ebé define ona mak hahú husi Palásiu Prezidensiál nia oin tun ba tasi-ibun to’o Dolok Oan Kristu Rei nia kotuk.
Jornalista : Hortencio Sanchez
Editór : Cancio Ximenes
