Tribunál aplika Prizaun Preventiva ba CdA ne’ebé halakon nia kaben nia vida
DILI, 24 Marsu 2025 (TATOLI)–Tribunál Primeira Instánsia Dili (TJPID), Tersa ne’e, liuhusi Juíz Estajiáriu, Cipriano Sarmento, hasai ona despaisu ikus ba kazu omesídiu agravadu ne’ebé envolve husi arguidu CdA, ne’ebé oho nia kaben, Verónica dos Santos, iha área Praia dos Coqueiros, Sábadu (21/03/2026).
Iha despaisu ne’ebé Juiz Turnu ne’e hasai, aplika medida Prizaun Preventiva ba arguidu CdA.
Hafoin desizaun ne’e, Ministériu Públiku (MP) ezekuta desizaun Tribunál hodi orienta Autoridade Seguransa lori kedan arguidu CdA ba estabesimentu Prizionál Bekora hodi kumpre medida koasaun ne’e.
Notísia relevante : Arguidu suspetadu oho nia kaben submete ba interrogatóriu judisiál
Defeza husi Arguidu CdA, Defensór Públiku Sérgio Dias Quintas, aseita ho MP nia alegasaun tanba nia asistidu nia hahalok ne’e priense elementu krime omesídiu agravadu.
“Despaisu husi Juíz nian, ita hatene katak prosesu investigasaun sei la’o hela, entaun hanesan Defensór Públiku mós asegura buat ida segredu justisa,” nia akresenta.
Tanba ne’e, MP nia faktus ne’ebé imputa ba arguidu labele fó sai iha mídia maibé to’o tempu ida bainhira MP halo akuzasaun mak foin bele hatene arguidu CdA nia motivu sona nia kaben.
“Ohin ha’u dehan katak tanba segredu justisa, ha’u labele ko’alia buat ruma, soké ohin Ministériu Públiku husu promosaun atu aplika Prizaun Preventiva, tanba ha’u haree nia krime ne’e gravidade tanba omesídiu bazeia ba artigu 183° husi Kódigu Prosesu Penál, entaun ha’u mós aseita ho Ministériu Públiku nia promosaun,” nia katak.
Sérgio dehan, karik Juíz konkorda ho MP nia promosaun hodi aplika Prizaun Preventiva, dalaruma ida-ne’e mak di’ak liu atu asegura arguidu depois to’o tempu ida mak haree investigasaun ne’e oinsá.
“Ohin iha primeiru interrogatóriu, nia rasik dehan katak iha altura ne’ebá nia ho kondisaun lanu o que sertu nia la’ós ema ida ineputabilidade maibé nia ema normál, prátika krime ida ne’e mak ohin realiza Primeira interrogatóriu ne’e,” nia katak.
Jornalista : Natalino Costa
Editora : Julia Chatarina
