DILI, 25 Marsu 2026 (TATOLI)—Diretór Ezekutivu Asosiasaun Defisiénsia Timor-Leste (ADTL), Cesário da Silva solisita Governu liliu Ministériu Solidariedade Sosiál no Inkluzaun (MSSI) atu hafásil prosesu ema ho defisiénsia asesu ba subsídiu.
“Relasiona ho subsídiu ba ami ema ho kondisaun defisiénsia ne’e Ministériu Solidariedade Sosiál no Inkluzaun atu hafásil prosesu sira atu garante ema ho defisiénsia hotu-hotu hodi hetan direitu hanesan. Durante ne’e problema ne’ebé enfrentadu mak difísil hetan dokumentu nesesáriu sira. Ida-ne’e sai problema boot,” nia dehan ba TATOLI iha nian kna’ar fatin, Maskareñas, Kuarta ne’e.
Nia preokupa tebes tanba ema ho defisiénsia hamutuk rihun 17-resin seidauk hetan subsídiu husi Ministériu Solidariedade Sosiál no Inkluzaun, nune’e presiza atensaun ba asuntu ne’e.
“Ita presiza haree ema ho defisiénsia ne’ebé vulneravel liu,” nia preokupa.
Nune’e, nia solisita ba autoridade lokál hanesan xefe suku ho xefe aldeia sira no delegada ho delegadu sira atu tun ba área rurál hodi identifika ema ho defisiénsia, hodi prosesa dokumentu sira.
Solisita ME rekruta manorin ba ema ho defisiénsia
Iha parte seluk, Diretór Ezekutivu Asosiasaun Defisiénsia Timor-Leste (ADTL) husu Ministériu Edukasaun (ME) atu halo rekrutamentu ba manorin sira atu hanorin estudante ne’ebé ho kondisaun defisiénsia.
“Ha’u hanoin esensiál tebes Governu liuhusi Konsellu Ministru aprova ona ensinu rekorrente sekundária nian iha fulan-Fevereiru tinan ida-ne’e. Tanba ne’e, Ministériu Edukasaun mós presiza halo polítika ida oinsá prepara rekursu umanu tanba estudante ho kondisaun defisiénsia ne’e ho tipu oioin,” Cesário dehan iha nia kna’ar fatin.
Nia haktuir dezde uluk kedas ADTL ezije tenke iha lei ensinu rekorrente sekundáriu, atu hatán ba ema ho defisiénsia sira-ne’ebé para eskola no sira-ne’ebé ramata ona eskola primária sira.
ADTL nia membru ema ho defisiénsia asesu iha eskola klase rekorrente nivel sekundária hamutuk 100-resin ne’ebé foin ramata iha nivel 5 ne’e ekivalente ho ensinu báziku.
Jornalista: Osória Marques
Editór: Xisto Freitas da Piedade
