DILI, 25 Marsu 2026 (TATOLI)-Komisaun C iha Parlamentu Nasionál ne’ebé trata Asuntu Finansa Públika hahú halo audiénsia públika hodi rona opiniaun husi Banku Mundiál no Banku Aziátiku Dezenvolvimentu (BAD) kona-ba proposta Lei númeru 22/VI(2a)-Rejime Jerál Sistema Finanseira no Atividade Bankária.
Prezidente Komisaun C, Cedelízia Faria dos Santos, hateten komisaun halo audiénsia ba dahuluk ne’ebé parte rua konkorda lei ne’e importante, no tempu ona atu iha lei foun tanba durante ne’e uza de’it regulamentu husi UNTAET nian.
“Iha lei ida-ne’e, sira-nia preokupasaun mak iha artigu barak [hamutuk] 286, entaun buat ki’ikoan husi sira-nia hanoin di’ak liu ita regula de’it iha dekretu-lei, tanba bainhira halo alterasaun lei presiza tempu”, nia hateten iha Parlamentu Nasionál, ohin.
Hodi hato’o mós preokupasaun atu haree iha lei foun ne’e liuliu tanba iha regulamentu UNTAET prevee katak atu harii banku ida mínimu iha millaun $5. “Maibé, bainhira ita altera lei ne’e, atu harii banku nasionál ka internasionál iha Timor-Leste tenke ho millaun $25, ne’ebé husu komisaun atu haree”, nia dehan.
Reprezentante Banku Mundiál iha Timor-Leste, David Freedman, sujere atu iha lei ne’e aliña ho padraun legál balun ne’ebé eziste ona hanesan dekretu-lei ba sistema pagamentu oinsá mak bele enkaixa konseitu kona-ba sistema finanseiru modernu no asesu informasaun kréditu, jestaun informasaun, rekizitu ba kapitál mínimu ba banku sira atu hetan lisensa bankária no simplifika prosesu iha ezbosu lei ne’e.
Lembra katak, iha 04 Juñu 2025, Konsellu Ministru aprova Rejime Jerál ba Sistema Finanseira no Atividade Bankária ne’ebé ho objetivu atu moderniza no hametin kuadru legál ne’ebé regula sistema finanseira nasionál, ho énfaze espesiál ba atividade bankária, hodi substitui rejime ne’ebé daudaun vigora.
Notísia relevante: https://tatoli.tl/2025/06/04/governu-aprova-rejime-jeral-ba-sistema-finanseiru-no-atividade-bankaria/
Jornalista: Nelson de Sousa
Editora: Maria Auxiliadora
