Embaixadór Indonézia-Índia despede Prezidente Ramos-Horta
DILI, 25 Marsu 2026 (TATOLI)–Embaixadór husi Indonézia no Índia ne’ebé termina ona sira-nia misaun diplomasia iha Timor-Leste, kuarta ne’e, iha Palásiu Prezidensiál, Nicolau Lobato Dili, despede Prezidente Repúblika José Ramos-Horta antes sira husik Timor-Leste iha tempu besik.
Iha biban ne’e, Xefe Estadu mós kondekora Embaixadór Indonézia Okto Dorinus ho medalla Orden Timor-Leste.
Embaxadór Indonézia iha Timor-Leste, Okto Dorinus Manik, hato’o agradesimentu no subliña katak atribuisaun kondekorasaun ne’e reprezenta esforsu koletivu ida husi ekipa Embaixada Indonézia ne’ebé durante ne’e servisu hamutuk ho nia.
“Ne’e hanesan onra boot ida mai ha’u hodi simu kondekorasaun ida-ne’e tanba ha’u kompleta servisu liu tinan haat iha Timor-Leste. Rekoñesimentu ida-ne’e la’ós de’it mai ha’u nia-an, maibé ba sira hotu ne’ebé servisu hamutuk ho ha’u. Ida-ne’e hatudu katak amizade no kooperasaun entre ita-nia nasaun sei sai metin liután no sei lori benefísiu konkretu ba povo rai-rua nian,” nia dehan.
Diplomata ne’e mós hato’o agradesimentu ba Governu Timor-Leste, ba ekipa Embaixada Indonézia no komunidade Indonézia iha Timor-Leste ba apoiu ne’ebé durante nia halo misaun iha Timor-Leste. Okto Dorinus Manik konsidera Timor-Leste espesiál iha nia moris tanba durante ne’e hala’o missaun ne’ebé hetan apoiu husi ema hotu.
Embaixadór Okto Dorinus Manik hala’o ona kna’ar nu’udar Embaixadór Indonézia nian mai Timor-Leste husi fulan-Novembru 2021 to’o fulan-Marsu 2026. Durante ninia kna’ar iha Dili, nia serbisu besik ho parte interesada oioin, inklui ofisiál Governu nian, líder emprezariál no komunidade enjerál.
Ninia inisiativa sira inklui fasilita enkontru entre xefe Estadu sira, ofisiál sira ministériu nian, autór emprezariál sira no fó apoiu maka’as ba Timor-Leste nia esforsu adezaun ba ASEAN.
Iha ninia lideransa, projetu konkretu oioin implementa ona, inklui lansamentu ba transporte fronteira ho servisu bus direta entre Dili no Kupang iha tinan 2023, no kooperasaun téknika iha setór oioin hanesan dezenvolvimentu sentru akua-kultura iha Aileu, programa bolsa estudu, apoiu agrikultura no projetu kolaborativu sira seluk.
Embaixadór mós envolve ativamente iha inisiativa sosiál sira ba sidadaun Indonézia no komunidade lokál, inklui servisu kuidadu saúde iha Igreja Dare iha tinan 2024. Nu’udar dekanu diplomátiku, Embaixadór Okto hametin relasaun sira ho korpu diplomátiku sira iha Timor-Leste. Nu’udar rekoñesimentu ba nia realizasaun sira, Embaixadór Okto simu nomeasaun atu kontinua nia servisu nu’udar Embaixadór Indonézia nian ba Papua Nova Giné.
Prezidente Ramos-Horta louva Embaixadór Okto Dorinus Manik ne’ebé konsolida parseria abranjente entre viziñu rua ne’e. Nu’udar rekoñesimentu ba ninia servisu esepsionál, Prezidente kondekora Embaixadór Okto Dorinus Manik ho Grau Kolár Orden Timor-Leste nian, ida husi distinsaun aas liu nasaun nian, tuir Dekretu Prezidente Repúblika Nú. 28/2026.
“Ita-nia ligasaun ho Indonézia abut iha jeografia, istória komún, no espíritu kooperasaun ne’ebé kontinua dezenvolve. Hein katak kondekorasaun ida-ne’e bele simboliza amizade ne’ebé dura, konfiansa no prosperidade komún entre ita-nia povu,” Ramos-Horta hateten iha nia diskursu.
Embaixadór Okto Dorinus Manik lakle’ur tan sei sai husik Dili hodi asume ninia kna’ar foun nu’udar Embaixadór Indonézia nian hodi hala’o misaun iha Papua Nova Giné.
Iha serimónia ne’ebé hanesan, Prezidente Ramos-Horta mós despede Embaixadór Estraordináriu no Plenipotensiáriu Repúblika Índia nian iha Timor-Leste, Shri Madan Kumar Ghildiyal.
Prezidente Ramos-Horta elojia Embaixadór Ghildiyal tanba avansa diálogu sira iha nivel aas, kooperasaun defeza no esforsu sira kapasitasaun nian. Maske regulamentu Índia nian ne’ebé prevene atribuisaun Orden Timor-Leste nian, Prezidente espresa publikamente apresiasaun kle’an ba diplomasia vizionáriu husi Embaixadór Ghildiyal.
“Índia nia apoiu jenerozu iha saúde, edukasaun, no infraestrutura iha impaktu ne’ebé kle’an tebes ba komunidade Timor-oan sira. Embaixadór nia legadu amizade, kolaborasaun no diplomasia vizionáriu sei kontinua inspira relasaun Timor-Leste no Índia ba tinan barak tuir mai,”deklara Prezidente J. Ramos-Horta
Serimónia despedida ne’e konklui ho Prezidente Ramos-Horta hato’o nia apresiasaun kle’an liu ba embaixadór na’in rua no espera atu kontinua harii sira nia legadu ho sira-nia susesór.
Embaixadór Shri Madan Kumar Ghildiyal, diplomata kareira ho servisu liu dékada tolu, asume nia kargu iha Timor-Leste iha loron 28 fulan-Marsu tinan 2025. Durante ninia mandatu, Índia no Timor-Leste hametin liután sira-nia kooperasaun bilaterál liuhosi inisiativa oioin ne’ebé inovadora. Nasaun rua ne’e konkorda ona atu estabelese Sentru Exelénsia iha Teknolojia Informasaun nian iha kampus Hera husi Universidade Nasionál Timor Lorosa’e (UNTL), ne’ebé reflete sira-nia kompromisu hamutuk atu avansa kapasidade dijitál.
Kolaborasaun iha kapasitasaun mós habelar ona iha ámbitu Programa Koperasaun Téknika no Ekonómika Índia nian (ITEC), ho Embaixada Índia fasilita oportunidade formasaun ba funsionáriu públiku Timor-oan sira.
Notavelmente, ofisiál na’in-10 husi Komisaun Funsaun Públika, Ministériu Finansa, no Ministériu Transporte no Komunikasaun partisipa iha programa formasaun espesializadu ida kona-ba siberseguransa iha New Delhi durante fulan-Fevereiru to’o fulan Marsu 2026, enkuantu diplomata na’in11 tuir Kursu Diplomátiku Espesiál iha fulan Marsu 2026.
Iha setór saúde, Memorandu Entendimentu kona-ba Kuidadu Saude renova ba períodu tinan lima tan, hodi subliña kooperasaun kontinua iha saúde públika. Envolvimentu iha promosaun turizmu mós reforsa ona, inklui partisipasaun husi ofisiál nível Diretór ida no profisionál turizmu na’in-rua (2) husi Timor-Leste iha Programa Interkámbiu Turizmu ASEAN–Índia ne’ebé hala’o iha Bangalore no Guwahati, nomós eventu promosaun turizmu ne’ebé organiza husi Embaixada Índia ho partisipasaun husi Diretór Jerál Turizmu.
Aleinde ne’e, Embaixada parseria ho Ministériu Juventude, Desportu, Arte no Kultura Timor-Leste nian, organiza selebrasaun Loron Internasionál Yoga, hodi haburas liután relasaun kulturál no ligasaun entre povu nasaun rua ne’e.
Jornalista : Hortencio Sanchez
Editór : Cancio Ximenes
