SEI enkoraja feto-maluk sai na’in ba rai iha Baukau
BAUKAU, 25 Marsu 2026 (TATOLI)—Sekretaria Estadu Igualdade (SEI) enkoraja feto-maluk atu sai na’in ba rai no propriedade privada iha Munisípiu Baukau.
Pontu Vogál Sekretaria Estadu Igualdade Munisípiu Baukau, Domingas Soares Nunes, esplika feto iha direitu atu sai na’in ba propriedade privada hanesan rai iha-ne’ebé bazeia ba lei numéru 03/2017, 05 Juñu, kona-ba rejime espesiál ba definisaun titularidade bens no movies.
“Importante tebes tanba lei ne’e vigora ona iha 2017 maibé maioria feto-maluk seidauk iha informasaun tanba feto sai na’in ba rai sei mínimu tebes,” Domingas Nunes hateten iha Salaun Apuramentu Administrasaun Munisipál Vila Nova, Kuarta ne’e.
Domingos Nunes husu ba partisipante sira-ne’ebé rona matéria ne’ebé aprezenta atu kontinua hatutan ba feto-maluk seluk liuliu iha área rurál ho esperansa bele asegura feto labele sai vítima ba rai bainhira divórsiu iha futuru.
Nia relata durante ne’e mane mak sempre sai na’in ba propriedade família nune’e liuhusi sosializasaun lei referida bele loke oportunidade ba feto sira atu rejistu iha Diresaun Terra no Propriedade tuir regulamentu ne’ebé estabelese ona.
“Dadus loloos seidauk iha maibé tuir informasaun ne’ebé iha Munisípiu Baukau foin pursentu sanulu (10) mak rejista sai na’in ba rai,” Domingas Nunes akresenta.
LEI N.º 13/2017, 5 Juñu, kona-ba rejime espesiál ba definisaun titularidade bens imóveis buka klarifika situasaun jurídika kona-ba na’in ba rai no halo efetivu dimensaun oioin direitu propriedade privada nian, ne’ebé prevee ona iha artigu 54.º Nú. 1 Konstituisaun Repúblika Demokrátika Timor-Leste nian.
Iha lei referida, artigu 4 hateten “Igualdade ba direitu sira” katak direitu propriedade ba bens imóveis sei asegura ho kondisaun hanesan ba mane no feto, no bandu kualkér forma atu halo diskriminasaun ba titularidade, asesu, jestaun, administrasaun, gozu, transferénsia ka dispozisaun bens imóveis nian.
Aleinde ne’e, atividade sosializasaun referida fahe mós informasaun kona-ba prevensaun violénsia doméstika tuir Lei Numéru 07/2010 kona-ba violénsia doméstika ne’ebé aprezenta husi Unidade Pesoal Vulneravel (VPU-sigla ingleza) Munisípiu Baukau.
Entretantu, atividade sosializasaun lei rua referida hetan partisipasaun husi reprezentante asosiasaun feto, kargu diretór serbisu munisipál, administradór postu administrativu no grupu feto husi postu administrativu hamutuk na’in-60 resin.
Jornalista: Natalino Belo
Editór: Xisto Freitas da Piedade
