OEKUSI, 25 Marsu 2026 (TATOLI) – Diresaun Rejionál Edukasaun no Solidariedade Sosiál, Rejiaun Administrativa Espesiál Oekusi Ambeno (RAEOA), kuarta lorokraik ne’e, hasai sirkulár ofisiál ida, ho urjénsia, ho nia asuntu despaixu ‘bandu totál vendedór’ sira atu kontinua fa’an iha arredór eskola sira.
Dokumentu ofisiál ne’e, Ajénsia Tatoli,I.P asesu iha Sekretáriadu Diresaun Rejionál Edukasaun no Solidariedade Sosiál, ho númeru referénsia 67/Desp-DRESS/RAEOA-TL/III/2026.
Sirkulár urjénsia ofisiál ne’e, hodi informa ba dirijente eskola sira, iha nível hothotu iha territóriu Oekusi, ho asuntu despaixu ‘bandu vendedór fa’an iha arredór eskola’ ho klasifikasaun importante, pertinente no nesesária atu ezekuta.
“Nu’udar Diretór Rejionál Edukasaun no Solidariedade Sosiál, haree ba pássadu, prezente no ba futuru katak, bazeia ba observasaun iha eskola hothotu iha territóriu RAEOA, vendedór barak fa’an ka hala’o negosiu iha arredór eskola inklui sirkulasaun animál livre tama sai eskola hodi fó impaktu ba atividade aprendizajen,” sita iha sirkulár ofisiál ne’ebé Ajénsia Tatoli,I.P asesu, iha kuarta lorokraik ne’e.
Notísia relevante:Edukasaun Oekusi hasai sirkulár husu ensinu hotu inklui funsionáriu atu kumpre
Iha karta ofisiál ne’e mós esplika katak, bainhira vendedór kontinua fa’an iha área eskola, fó impaktu ba atividade prinsipál haat iha eskola, primeiru perturba konsentrasaun estudante no profesór sira durante andamentu ensinu aprendizajen.
Daruak, perturba maravilloza ambiente eskola, datoluk hafo’er ambiente eskola no ikusliu animál barak estrada jardin no ai-horis sira iha arredór eskola.
Tanba ne’e, nu’udar Diretór Rejionál Edukasaun no Solidariedade Sosiál, bandu totál no husu dirijente eskola sira hotu, atu muda sai obrigatoriamente negosiante sira-ne’ebé mak fa’an iha areadór eskola hothotu iha territóriu RAEOA, no foti asaun atu oho animál sira-ne’ebé mak tama sai sai iha arredór eskola.
“Dezde depaixu ida-ne’e to’o dirijente eskola sira, liuhusi meiu komunikasaun ka mídia sira públika ona, husu atu ezekuta kedas hanesan orden, ‘laiha razaun tanba eskola la’ós merkadu no luhan’,” sita ikus iha karta ofisiál ne’e.
Notísia relevante:Edukasaun Oekusi hasai sirkulár ba estudante 9° ano matrikula de’it iha ESGP paralelu
Entretantu, dokumentu ofisiál ne’e, asina direita husi Diretór Rejionál Edukasaun no Solidariedade Sosiál Oekusi, Vincencio Cono, no kópia sira entrega ba iha Prezidente Autoridade RAEOA, Diretór Jerál Oekusi, Diretór Diresaun Rejionál sira.
Nune’e mós entrega kópia ida ba iha autoridade postu administrativu haat, xefe suku 20 ho nia aldeia sira, superentendente Diresaun Edukasaun no Solidariedade Sosiál, no xefe departamentu sira hotu.
Jornalista: Abílio Elo Nini
Editór: Rafael Ximenes de A. Belo
