DILI, 26 Marsu 2026 (TATOLI)—Embaixadór Timor-Leste iha Indonézia, Roberto Soares, informa antigu Prezidente Repúblika Indonézia, Megawati Setiawati Sukarnoputri, sei vizita Timor-Leste iha Maiu 2026.
“Tanba iha ita-nia restaurasaun independénsia ne’e antigu Xefe Estadu Indonézia ne’e mós marka prezensa sai sasin no ofisialmente rekonese katak Timor-Leste nu’udar nasaun foun iha sékulu-21,” Embaixadór ne’e informa ba jornalista sira hafoin ramata enkontru ho Primeiru-Ministru iha Palásiu Governu, ohin.
Tanba ne’e, nia dehan, antigu Xefe Estadu ne’e manifesta ninia vontade atu mai vizita Timor-Leste iha 20 Maiu 2026, atu hametin relasaun iha kooperasaun bilateral entre Timor-Leste ho Indonézia.
“Entaun ho ida ne’e hatudu jeralmente Timor-Leste nia relasaun ho Indonézia furak tebes tanba ita haree husi perspetiva relasaun ema ho ema, Governu ba Governu (G to G) aspetu sósiu kulturál, tanba ne’e ohin simu orientasaun husi Xefe Governu atu kontinua nafatin mantein servisu ne’e ho didi’ak hodi hametin relasaun kooperasaun bilaterál entre nasaun rua ne’e,” nia dehan.
Jornalista : Alexandra da Costa
Editór : Cancio Ximenes
