DILI, 26 Marsu 2026 (TATOLI) – Banku Nasionál Timor-Leste (BNCTL, sigla portugés) fasilita pagamentu direta iha rezidénsia idozu sira iha territóriu ne’ebé ho kondisaun moras.
Prezidente Konsellu Administrasaun BNCTL, Januário da Gama, husu ba benefisáriu sira iha territóriu ne’ebé ho kondisaun moras la presiza mai forma iha suku tuir kalendáriu pagamentu ne’ebé fó sai ona.
“Ami hakarak informa ba benefisáriu sira, ne’ebé moras labele obriga atu lori mai iha suku para simu [osan], tanba sira-nia tempu atu atende tuir ona akordu”, nia hateten iha Parlamentu Nasionál, ohin.
Tuir nia, pagamentu ba benefisáriu ho kondisaun moras sei realiza hafoin pagamentu ba idozu sira seluk. Prosesu ida-ne’e realiza tuir akordu entre BNCTL no Ministériu Solidariedade Sosiál no Inkluzaun (MSSI), ne’ebé realiza kada fulan tolu.
Nia mós apela ba benefisáriu sira atu uza mákina ATM no konta bankária hodi simu sira-nia direitu, nune’e la presiza bá iha suku.
“Ita haree katak pagamentu hothotu uza ona konta bankária no balun komesa uza ona mákina ATM, no estabelese ona ajente banku iha suku sira”, nia dehan.
BNCTL fó sai ona oráriu pagamentu ba terseira idade no ema ho defisiénsia faze dahuluk tinan ne’e iha rejiaun leste hahú iha loron A0 to’o 24 abríl. Parte rai-klaran 23 Marsu to’o 21 Abríl no oeste iha 23 Marsu to’o 16 Abríl.
Jornalista: Nelson de Sousa
Editora: Maria Auxiliadora
