BAUKAU, 26 Marsu 2026 (TATOLI)—Ministériu Justisa (MJ) liuhusi Diresaun Servisu Rejistu Notariadu (DSRN) husu autoridade lokál apoia fornese dadus mortalidade husi kada suku iha Munisípiu Baukau nune’e bele fasilita komunidade trata dokumentu legál iha futuru.
Diretór Jerál Servisu Rejistu Notariadu (DGSRN), Agostinho Gonçalves Vieira, esplika diresaun referida aleinde trata dokumentu billete indentidade (BI) no sertidaun moris, durante ne’e rejista mós sertidaun óbitu ba komunidade ne’ebé lakon vida maibé hasoru dezafiu tanba autoridade lokál menus fornese dadus nune’e difikulta prosesu hotu iha DSRN.
“Ita hotu tenke serbisu hamutuk, liuliu xefe suku, xefe aldeia sira. Sira mak hatene liu sé mak mate, sé mak moris, tanba problema barak mak mosu autoridade suku sira laiha seriedade, tanba presiza fó informasaun ne’ebé loos,” Agostinho Gonçalves Vieira hateten bainhira workshop ho tema haforsa vijilansía mortalidade iha Rejistu Sivíl Estatístika Vitál (CRVS) iha Salaun Apuramentu Vila Nova, Baukau, Kinta ne’e.
Agostinho Vieira relata Ministériu Justisa liuhusi Serbisu Rejistu no Notariadu atualmente iha ona sistema no rekursu umanu ne’ebé adekuadu atu fasilita atendimentu dokumentu hotu relasiona ho sidadaun sira maibé nafatin iha dezafiu tanba maioria komunidade la tau importánsia ba sertidaun óbitu inklui falta koordenasaun ho autoridade lokál.
Nia konsidera dadus óbitu importante tanba fasilita dokumentu legál ba prosesu tomak iha Ministériu Justisa hanesan evita mosu kazu sivíl hanesan sertifikadu rai, patromóniu seluk inklui subsídiu ba membru família.
Iha fatin hanesan, Xefe Suku Afasá, Joaquim Fernandes Ximenes konsidera rejista númeru mortalidade iha suku importante iha-ne’ebé sei rekolla dadus lista husi baze maibé nia rekomenda tenke define tempu implementasaun tanba durante ne’e autoridade suku rejista taxa mortalidade bazeia ba viza família husi iha tinan 2011 to’o 2024 antes reverifika hikas iha tinan 2025 to’o atuál.
“Ami presiza iha informasaun klara atu implementa tuir buat ne’ebé Governu sentrál orienta,” Joaquim Ximenes hateten.
Entretantu, Serbisu Rejistu no Notariadu Ministériu Justisa nu’udár fatin ba sidadaun atu hetan dokumentu sira hanesan pasaporte, billete indentidade, sertidaun moris, kazamentu inklui óbitu no seluk tan.
Jornalista: Natalino Belo
Editór: Xisto Freitas da Piedade
