DILI, 26 Marsu 2026 (TATOLI)—Ministériu Koordenasaun Asuntu Sosiál (MKAS) realiza diálogu sosiál juventude entre organizasaun voluntária sentru juventude no sentru formasaun profisionál sira-ne’ebé ho tema “Empoderamentu Juventude ho Karakter Forte ba Konstrusaun Pás, Estadu no Nasaun”, iha salaun Komisaun Nasionál Eleisaun (CNE-sigla portugeza), Kinta ne’e.
Vise Primeiru-Ministru no Ministru Koordenadór Asuntu Sosiál no Ministru Dezenvolvimentu Abitasaun Rurál, Mariano Assanami Sabino, hateten juventude tenke hahú ona halo transformasaun pás iha konstrusaun Estadu no nasaun ida-ne’e.
“Empoderamentu juventude hodi hametin pás iha Timor-Leste ne’e estudante no juventude mak tenke intelektuál, badinas, esforsu no haka’as oinsá lori dezenvolvimentu nasionál ba país ida-ne’e. Ita-nia dezenvolvimentu nasionál mak liuhusi ita-boot juventude, ne’ebé transforma liuhusi ita-boot sira-nia intelektuál, siénsia ne’ebé imi simu iha universidade,” Vise Primeiru-Ministru Assanami Sabino dehan.
Tanba ne’e, liuhosi diálogu ida-ne’e bele loke juventude nia hanoin oinsá sai juventude ida-ne’ebé intelektuál iha país ida-ne’e. Labele lakon esperansa iha moris ida-ne’e, tanba ne’e tenke firme hasoru dezafiu ne’ebé iha.
“Objetivu prinsipál hosi diálogu ne’e atu mak atu oinsá estadu no Governu ida-ne’e bele rona sujestaun krítika no rekomendasaun sira hodi juventude, nune’e mós estudante simu mensajen hosi Governu. Nasaun ida sempre iha problema maibé la signifika husik de’it. Ita buka meiu oi-oin oinsá bele solusiona,” Assanami tenik.
Nune’e mós, Ministru Juventude, Desportu, Arte no Kultura, Nelyo Isaac Sarmento, hatutan karakter maihusi família no edukasaun mak bele hamosu pás iha nasaun ida.
“Prepara ita-nia an sai juventude timoroan ne’ebé ho karakter onestu, no karakter responsabilidade,” Nelyo subliña.
Aleinde ne’e, reprezentante juventude, Mario Texeira, hateten tema ba loron ohin di’ak tebes ba juventude atu oinsá iha obrigasaun hodi banati, maibé atu katak pás ne’e tenke maihosi família hafoin bá iha sosiedade.
“Agora atu dehan empodera ona juventude ka lae, ne’e ba ha’u la’ós kestaun maibé filafali ba ema idaidak nia hanoin,” nia dehan.
Jornalista: Osória Marques
Editór: Xisto Freitas da Piedade
