DILI, 26 Marsu 2026 (TATOLI) – Governu Filipina liuhusi Departamentu Ekonomia, Planeamentu no Dezenvolvimentu (DEPDev, sigla inglés) iha kompromisu atu serbisu besik ho membru sira hosi Asosiasaun Nasaun sira Sudeste Aziátiku nian (ASEAN) no parseiru dezenvolvimentu sira hodi harii ASEAN ida ne’ebé ligadu liu, reziliente no prósperu liuhosi dezenvolvimentu infraestrutura sustentável.
Sub-Sekretáriu DEPDev no prezidente ACSI Joseph Capuno halo kompromisu ne’e durante enkontru Komité ASEAN kona-ba Infraestrutura Sustentável (ACSI, sigla inglés ) ne’ebé hala’o iha loron 12 fulan-Marsu iha Sentru Konvensaun Internasionál Filipina (PICC) iha Sidade Pasay.
Iha komunikadu ida iha loron-kuarta, DEPDev hatete katak nia hakarak aproveita nasaun nia prezidénsia ba Simeira ASEAN 2026 nian hodi avansa ajenda infraestrutura sustentável nian.
ACSI hala’o papél krítiku ida hodi avansa kooperasaun rejionál kona-ba infraestrutura sustentável.
DEPDev hatete katak enkontru PICC nian foka ba Planu Asaun Infraestrutura Sustentável (SIAP) 2026-2030.
Marka prezensa iha enkontru ne’e maka delegasaun sira husi Laos, Malázia, Miánmar, Singapura, Timor-Leste, Vietname, no Sekretariadu ASEAN. Xefe delegasaun sira husi Brunei, Kamboja, Indonézia, no Tailándia tuir enkontru ne’e virtualmente.
Parseiru esternu sira hosi ASEAN, inklui Banku Investimentu Infraestrutura Aziátiku, Uniaun Europeia, Korporasaun Bankária Sumitomo Mitsui, no UN-Habitat, mós marka prezensa.
Rekoñese papél infraestrutura sustentável nian iha hasa’e konetividade rejionál, SIAP hakarak atu habelar rede infraestrutura sustentável nian entre Estadu-membru sira ASEAN nian.
Vizaun ne’e ho objetivu atu hasa’e kompetividade ekonómika, hametin integrasaun rejionál, promove reziliénsia, no hadi’a povu nia moris.
Kobre medida estratéjiku neen, SIAP sei halo kolaborasaun no parseria rejionál sira hodi alkansa ho susesu objetivu atu hatán ba tendénsia atuál no emerjente sira iha infraestrutura. SIAP aliña ho Planu Estratéjiku Konetividade ASEAN nian (ACSP).
Adopta iha 2025, ACSP trasa vizaun rejiaun nian ba tempu naruk atu hametin konetividade fíziku, institusionál, no ema-ba-ema hodi apoia Vizaun Komunidade ASEAN 2045.
Capuno espresa apoiu ba proposta Programa Multi-Anuál kona-ba Hasa’e Dezenvolvimentu Infraestrutura Sustentável no Kooperasaun iha ASEAN ne’ebé ho objetivu atu harii parseria ne’ebé forte liu ho parseiru esternu sira hodi taka lakuna entre planeamentu no implementasaun, hodi transforma objetivu konetividade sira ba rezultadu tanjível sira.
Fonte: PNA
