DILI, 26 Marsu 2026 (TATOLI)–Segundu Komandante Jerál Polísia Nasionál Timor-Leste (PNTL), Komisária Asistente Natercia Eufrásia Soares Martins, agradese ba Governu tanba bele fó fiar ba nia nu’udar feto dahuluk lidera instituisaun seguransa ne’e.
“Primeiru apresia ba konfiansa, obrigada ba konfiansa ba feto sira hodi hamutuk ho Primeira Komandante lidera ba ita-nia PNTL ba tinan-tolu nia laran,” Komisária Asistente Natercia hateten ba Jornalista sira iha Sentru Formasaun Polísia Komoro, Kinta ne’e.
Nia dehan, kargu ne’e tenke haree hanesan responsabilidade no konfiansa tomak.
“Husi responsabilidade mak kompeténsia saida ita sei haree, haree filafali ba problema saida mak durante ne’e internalmente hasoru hodi afeita ba operasaun, dalaruma nia serbisu ladún di’ak, komunidade ladún satisfaz ka ninian kauza ne’e mai husi ne’ebé para buka solusaun, nune’e atu lori instituisaun ida-ne’e atu serví institusaun ho profisionál liu tuir lei,” nia akresenta.
Notísia relevante : Governu nomea Komisáriu Asistente Afonso no Natercia lidera PNTL
Komisária Natercia konsidera mensajen husi Ministru Interiór kona-ba kompeténsia ne’ebé tuir Lei Orgánika atribui ona ba Komandante Jerál no Segundu Komandante Jerál PNTL.
“Normalmente hanesan Segundu Komandante Jerál PNTL sei haree liu ba internál hanesan administrasaun, ida-ne’e mós la sees husi nesesidade operasionál, ita haree era ida agora haree situasaun ne’ebé presiza atu kapasita rekursu umanu, haree kona-ba ita-nia infraestrutura sira tenke adekuadu hodi fó apoiu, haree mós ba membru apoiu teknolojia hodi dijitaliza serbisu nune’e mais prinsipál poupa tempu gastu no enerjia,” nia akresenta.
Nune’e, Komisária Natercia komprometidu sei tau-matan ba kestaun pos adezaun ba ASEANm ne’ebé bele fó ameasa ba krime organizadu no hakat fronteira.
“Timoroan tomak la sensível ba seguransa, tanba ne’e mak buat boot ida ha’u labele esplika, tanba ne’e mós presiza informasaun no diskusaun husi internál Ofisiál Superiór halo levantamentu dadus sira ne’e hodi husu hanoin sira husi públiku, sosiedade sivil, veteranu, no rezisténsia konsulta ho ita-nia kolega di’ak liu ba tinan-tolu ne’e. Ita bele orienta ita-nia ekipa ho di’ak,” nia katak.
Jornalista : Natalino Costa
Editora : Julia Chatarina
