DILI, 09 Juñu 2026 (TATOLI)—Autoridade Aduaneira (AA)/Alfándega pasa informasaun ba Polísia Nasionál Timor-Leste (PNTL) kona-ba apreensaun ba sasán kontra bandu iha área Tibar iha kontentór 40 fit tama bá Portu Tibar ho nia dokumentu ne’ebé mak suspeita katak iha buat ruma iha laran.
“Nune’e, ami halo verifikasaun ba dokumentu hotu ne’ebé tama depois ita loke kontetór, ita hetan manifestu atu hatama sasán ne’e kadeira no meza maibé iha laran sigaru karton 830 mak iha laran, sigarru sira-ne’e ilegál no laiha lisensa. Tanba ne’e, Diresaun Servisu Investigasaun Kriminál lori sigarru ne’e mai halo identifikasaun hodi prosesu iha Ministériu Públiku. Kazu ne’e mós ami rejista ona ho númeru NUC 0207/PNSIK,” Portavós Komandu Jerál PNTL Superintendente, Xefe Polísia João Belo dos Reis, hateten ba Jornalista liuhusi Konferénsia Imprensa ne’ebé halo iha Kuartel Jerál PNTL, Kaikoli, Tersa ne’e.
Notísia relevante : Ekipa konjunta halo apreensaun ba sigarru ilegál kaixa 50 iha Kasnafar
Nia esplika, Polísia deteta sigarru sira ne’e orijen husi Kambódia, nune’e preokupa ho produsaun sigarru tanba baibain tenta atu hatama husi pontu entrada rai-maran.
“Maibé labele, entaun sira tenta atu hatama fali husi Tibar, na’in ba sasán orijen husi Xina mak mai, maibé iha kompañia timoroan ida ho inisial BM mak importa mai Timor-Leste,” nia akresenta.
Parte Seguransa holu ona timoroan BM hodi halo identifikasaun no kontinua buka tuir autór ne’ebé envolve.
“Ita foin mak hetan ema na’in-ida depois ita halo tracking nafatin ba sé sé mak iha laran ita sei bolu hotu mai hodi responsabiliza ba asaun ne’ebé sira halo,” nia katak.
Parte Diresaun Servisu Investigasaun Kriminál halo identifikasaun sasán kontra bandu sira no entrega ba Ministériu Públiku atu deside halo destroisaun ka atu halo leilaun.
“Ami-nia knaar mak identifika prosesu investigasaun pois aprezenta ba Ministeriu Públiku,” nia afirma.
Jornalista : Natalino Costa
Editora : Julia Chatarina
