DILI, 27 Fevereiru 2026 (TATOLI)–Ekipa konjunta kompostu husi Polísia Nasionál Timor-Leste (PNTL) husi Unidade Polisia Marrítima, Diresaun Nasionál Servisu Investigasaun Kriminál (DNSIK), Forsa Sekreta N2 Navál ho Servisu Nasionál Intelijénsia (SNI) halo ona apreensaun ba sasán kontra bandu hanesan sigarru Marlboro Kaixa-50 iha área Kasnafar, Munisípiu Aileu.
Sidadaun timoroan ida ho inisiál FTFM, idade 42 kondús karreta mini bus ho xapa matríkula C.10.579 TL tula sasán kontra bandu iha loron 26 Fevereiru tuku 19:30 kalan, nune’e ekipa konjunta halo apreensaun.
Hafoin ne’e, ekipa kontinua kedas lori evidénsia karreta no sigarru Marlboro, hamutuk ho kondutór ba edifísiu DNSIK hodi submete ba prosesu identifikasaun no rejista ho NUK 0070/26.PNSIC, molok aprezenta ba Ministériu Públiku (MP) atu kontinua prosesu tuir lei ne’ebé vigora.
Notísia relevante : AIFAESA halo inspesaun ba sigaru ilísitu ne’ebé faan iha merkadu Taibesi
Portavós PNTL, Superintendente Polísia João Belo dos Reis, informa, Autoridade forsa konjunta deskobre katak sidadaun ida tula sasán kontra bandu halo movimentu iha sidade Dili hodi suspeita nia envolve iha krime organizadu, hanesan halo importasaun ba sasán merkadoria ilegál ne’ebé Autoridade Timor-Leste bandu.
“Bainhira ita-nia ekipa halo vijilánsia, identifika no halo kedas apreensaun ba karreta mini bus ida, ita detekta sasán iha karreta laran iha sigarru ho tipu Marlboro hamutuk kaixa 50 ne’ebé denkonfia hatama husi Marrítima Tasi Mane mai Timor-Leste,” Portavós hato’o ba Jornalista sira iha sala konferénsia, Kuartél Jerál PNTL, Kaikoli, Sesta ne’e.
Nia hatutan : “Sidadaun timoroan ne’ebé kondús karreta tula sasán kontra bandu ne’e la’ós na’in ba sasán, maibé sasán na’in ne’e sidadaun estranjeiru balun, ne’ebé daudaun ne’e ita-nia ekipa investigasaun halo ona komunikasaun ho sira atu mai submete ba prosesu identifikasaun, tanba ita deskonfia iha sira-nia fatin iha sasán seluk ne’ebé sira hatama hamutuk ho sigaru ne’e ita sei halo operasaun buka tuir,” portavós katak.
Nune’e, ekipa konjunta daudaun halo serbisu iha terrenu atu kontinua buka evidénsia hanesan sigarru sira ne’ebé la’ós Marlboro orijinál, tanba iha informasaun sasán sira ne’e tama mai territóriu Timor-Leste dala barak ona.
Superintendente Polísia, João Belo dos Reis, hateten, Servisu Intelejénsia no servisu integradu sira seluk sei buka tuir nafatin tanba sigarru ilegál sira modelu transportasaun ne’e la’ós primeira vez tama Dili.
“Ita sei buka tuir sigarru sira ne’e nia paradeiru iha ne’ebé, sé mak uza no sé mak rai, ita sei buka tuir,” nia afirma.
João Belo dehan, bainhira sigarru Marlboro halo importasaun legál no empreza na’in ba sigarru ne’e rejista iha Governu ne’e konsidera legál, maibé iha fali produsaun seluk no tenta hatama produtu sira ne’e liuhusi dalan ilegál mai Timor-Leste maka tenke atua.
Jornalista : Natalino Costa
Editora : Julia Chatarina
