Komisaun F identifika Sentru Saúde Ossú seidauk iha uma maternidade
VIKEKE, 26 Marsu 2026 (TATOLI)—Membru Komisaun F husi Parlamentu Nasionál, Helena Martins Belo, informa Komisaun F Parlamentu Nasionál ba Asuntu Saúde, Seguransa Sosiál no Igualdade Jéneru halo fiskalizasaun ba Sentru Saúde Ossú hodi identifika katak seidauk iha uma maternidade ba inan-feton sira-ne’ebé partu.
“Ohin ami bá vizita Sentru Saúde Ossú hodi haree katak uma maternidade to’o agora seidauk iha. Ida-ne’e difikulta ita-nia inan-feton sira,” Deputada Helena Martins Belo hateten iha salaun Munisipiu Vikeke, Kinta ne’e.
Aleinde ne’e, Vise-Prezidente Komisaun F, Luís Caldeira hateten Komisaun F hala’o fiskalizasaun iha Munisípiu Vikeke ba dala-rua ona, ho objetivu atu fiskaliza servisu saúde, seguransa sosiál no igualdade jéneru nian.
“Iha fiskalizasaun ne’e ami vizita sentru saúde no postu saúde sira iha Ossú, hodi haree direta ba servisu sira,” Luís Caldeira haktuir.
Nia hatutan liuhusi fiskalizasaun ida-ne’e Komisaun F vizita mós Sentru Solidariedade Sosiál, Servisu Saúde munisípiu Vikeke, PVU no Konsellu Kombatente Liertasaun Nasionál (KKLN) Munisípiu Vikeke.
“Atu hatene instituisaun sira-nia progresu servisu durante ne’e no dezafiu sira, ami mós sei rekolla relatóriu husi kada instituisaun sira-ne’ebé ami vizita ba,” nia akresenta.
Iha fatin hanesan, Prezidente Autoridade Munisípiu Vikeke, Francisco C. S. de G. Soares, hato’o agradese ba Komisaun F ne’ebé mai halo fiskalizasaun iha Munisípiu Vikeke.
“Liuhusi fiskalizasaun ida-ne’e bele ajuda ami tanba bele haree direta ami-nia kondisaun fasilidade sira hanesan infraestrutura saúde no seluk tan,” nia hato’o.
Fiskalizasaun ne’e hala’o husi Prezidente Komisaun F ho nia membru sira no partisipa husi sekretáriu munisípiu, autoridade postu Vikeke Vila no diretór servisu munisipál sira.
Jornalista: Vitorino Lopes da Costa
Editór: Xisto Freitas da Piedade
